Bya Francis Ndugwa
Kampala – Kyaddondo
Ababaka abawera 13 nga bonna bannakibiina kya NRM be baakavaayo okulaga nga bwe bali abeetegefu okudda mu bigere bya Sipiika Jacob Oulanyah eyafiiridde mu ggwanga lya Amerika gye yali yatwalibwa okujjanjabwa gye buvuddeko.
Bano kati beetegekera okulonda okugenda okubaawo nga 25 May, 2022 ku Lwokutaano luno wabula omuwendo guno gusuubirwa okweyongera okulinnya. Bano 13 bamaze dda okuggyayo empapula ku kitebe kakiiko akakulira eby’okulonda mu kibiina kino ekisangibwa wano mu Kampala.
Anita Among
Mu bano kuliko n’abadde omumyuka wa Sipiika Anita Among era ono bw’abadde anona empapula asindise muyambi we Mary Athieno ng’okusinziira ku ssentebe w’akakiiko kano, Tanga Odoi, Among teyasobodde kwetuukira mu buntu kuba yabadde tawulira bulungi.
Wabula wabaddewo katemba abamu ku babaka bwe bazze ne bazingako ekitebe kino nga baagala Odoi aggalewo enteekateeka y’okuggyayo empapula wabula Odoi n’abigaana nti okwewandiisa kwakuggalawo ku ssaawa 11 ez’Olweggulo.
Jackson Kafuuzi
Amyuka Ssaabawolereza wa gavumenti, Jackson Kafuuzi naye yaggyeeyo empapula okusobola okuvuganya ku kifo kya Sipiika wa Palamenti y’e 11.
Sarah Opendi
Eyaliko Minisita w’ebyobulamu ng’ayita mu David Mujulizi naye aggyeeyo empapula ng’ayagala okuddira Oulanyah mu bigere asobole okukulembera Palamenti eno.
Jackson Atima
Omubaka wa Arua Central, Jackson Atima naye yeegwanyiza ekifo kino era yamaze dda okwewandiisa ng’asaba kimu akwasibwe bbendera y’ekibiina.
Felix Okot Ogong
Ono ye mubaka wa Dokolo South naye yataddemu okwewandiisa ng’agamba nti y’agwana ekifo kino okusobola okutambuza obulungi ensonga mu Palamenti eno.
Theodore Ssekikubo
Ssekikubo abasinga gwe bamanyi ng’omubaka munnakibiina kya NRM omujeemu naye amaze okwewandiisa nga kati alinze kimu kulaba oba ekibiina kinaamuwa omukisa.
Jacob Oboth Oboth
Omubaka wa West Budama South, Jacob Oboth Oboth agambibwa okulekulira ekifo kye ekya Minisita omubeezi ow’ebyokwerinda asobole okuvuganya ku kifo kya Sipiika.
Alex Brandon
Alex Kintu Brandon y’akiikirira Kagoma North era omwogezi w’akabondo ka NRM naye amaze okwewandiisa ku kifo kino.
Hamson Obua
Minisita omubeezi ow’ebyemizannyo, Denis Hamson Obua, naye ayingidde olwokaano okuvuganya ku ntebe eno.
Jane Ruth Aceng
Minisita w’ebyobulamu Jane Ruth Aceng eyayatiikirira ennyo olw’engeri gye yakulemberamu olutalo lw’okulwanyisa ekirwadde kya Corona naye amaze okuteekamu okusaba ng’ayita mu muyambi we, George William Ssebamala, okuddira Oulanyah mu bigere.
Florence Asiimwe
Asiimwe ye mubaka omukyala owa Masindi naye amaze okuteekamu okusaba ng’ayagala ekibiina kye kimulonde akikwatire bbendera ku kifo kya Sipiika.
John Okot Amos
Omusumba Amos naye agamba nti ekifo kino asobola bulungi okukitambuza singa ekibiina kye ekya NRM kibeera kimuwadde bbendera.
Pius Wakabi
Ono asibuka Hoima era ye mubaka wa Bugahya, Pius Wakabi Rujumba naye amaze okulaga nti ekifo kino akyagala.
Ababaka abalala abaagala ekifo kino kuliko aba Opozisono okuli; omubaka Asuman Basalirwa ne Ssemujju Nganda baagala bwasipiika ate Charles Ttebandeke ayagala bumyuka bwa Sipiika.