Bya Ssemakula John
Kampala
Eggye lya Uganda People’s Defence Forces (UPDF) lyategeezezza eggulo ng’eggwanga lya Amerika bwe lyatadde envumbo ku muduumizi w’ekitongole ky’amagye ekikessi ekya Chieftaincy of Military Intelligence (CMI), Maj. Gen. Abel Kandiho.
Eggye lya UPDF era lyayise mu mwogezi waalyo, Brig. Gen. Flavia Byekwaso nerivumirira engeri envumbo y’ebyenfuna zino gye zaateereddwa ku Gen. Kandiho nga ligamba nti tewaabaddewo bwenkanya ku nsonga eno.
‘Mu butongole tutegeezeddwa ku nvumbo ezaateekeddwa ku Maj. Gen. Abel Kandiho nga zaavudde mu Amerika.” Byekwaso bwe yannyonnyodde.
“Uganda ne UPDF ng’ekitongole kya gavumenti tetuli bamativu ku kyasaliddwawo eggwanga lye tutwala nti lya mukwano naffe era nga tulina emikago nabo nga tebasoose kutuwuliriza nakumanya mazima amatuufu.” Byekwaso bwe yagasseeko.
Kandiho yafuuse omunene owookubiri mu ggye lya UPDF okuteekebwako envumbo Abamerika ng’eyasooka ye Ssaabaduumizi wa poliisi, Gen. Kale Kayihura.
Tekinnamanyika nsonga yavuddeko nvumbo zino wadde ensonda mu by’okwerinda zigamba nti zeekuusa ku kulinnyirira ddembe ly’obuntu.
We tukoledde eggulire lino nga tekinnamanyika nvumbo zino bye zigenda kutwaliramu wadde ensonda era zigamba nti akawunta ze zigenda kukosebwa era agaanibwe n’okulinnya ekigere kye mu ggwanga lya Amerika, era takkirizibwe kukolagana na munnansi w’Amerika yenna wadde kkampuni mu byenfuna.