Bya Francis Ndugwa
Bulange – Mmengo
Katikkiro Charles Peter Mayiga yeebazizza abantu ba Kabaka mu masaza gonna 18 olw’okujjumbira enteekateeka y’Oluwalo awamu nokuwagira emirimu gya gavumenti ya Kabaka bwebaleese Oluwalo lwa kawumbi kalamba n’obukadde 13 mu mwaka 2022.
Okwebaza kuno Katikkiro Mayiga akukoledde mu Bulange e Mmengo bw’abadde aggalawo Oluwalo lw’ omwaka guno awamu n’okutikkula oluwalo okuva mu Abakiise embuga ssaza lya North West Pacific , Home Connect Properties, Bannabitone, essaza Kkooki, Busujju naba Buganda Golf Association.
Katikkiro Mayiga ategeezeza nti wakati nga Buganda ekyabanja Federo emirimu girina okusigala nga gitambula kubanga ekifananyi kya Buganda kiri mukuyamba bantu baayo kulaakulana.
Okusinziira ku Katikkiro Mayiga ensimbi zino bazikozesezza mu by’enjigiriza n’ebyobulamu, okutumbula embeera za bantu awamu n’okulabirira embuga za Nnyinimu.
Ku ssente zino obukadde 60 zateekebwa mukulwanyisa Mukenenya, okuzzaawo amasiro ge Kasubi obukadde 100, Ebyenjigiriza obukadde 76, enteekateeka y’ Emmwaanyi Terimba obukadde 283 nemitwalo 72.
Kamalabyonna era alaze nti ensimbi obukadde 39 nemitwalo 24 ziteereddwa ku kusima enzizi abantu ba Beene basobole okufuna amazzi amayonjo, obukadde 71 baziteeka ku kulabirira Bulange e Mmengo.
Ensimbi obukadde 210 n’emitwalo nebaziteeka kukutegeka Oluwalo era nga obukadde 93 n’okusoba zizibwayo ku ggombolola okusobola okuyambako ku mirimu.
Owek. Mayiga agamba nti Buganda okudda ku ntikko abantu balina okuvaamu okuyimba ebisomooza naye bakole n’obuyiiya okusobola okwekulaakulanya olwo Buganda esobole okudda ku ntikko.