Bya Ssemakula John
Kampala
Ssentebe w’ekibiina kya Forum for Democratic Change (FDC) avudde mu lwokaano lw’okukwatira FDC bbendera ku bwapulezidenti bw’atyo abadde Pulezidenti waakyo, Patrick Oboi Amuriat n’awangula bbendera y’ekibiina.
![](https://gambuuze.ug/wp-content/uploads/2020/10/oboi.jpg)
Kino kitegeeza nti Amuriat afunye bbendera ya FDC nga tavuganyiziddwa okwesogga akalulu ka 2021.
Biriggwa ategeezezza bannakibiina leero e Najjanankumbinti, yalabye nga Amuriat y’ajja okusobola okuwa Pulezidenti Museveni akaseera akazibu n’asalawo obutayonoona budde.
Ono yavaayo n’alaga nti mwetegefu okuggya Pulezidenti Museveni mu ntebe oluvannyuma lwa Dr. Kizza Besigye okulaga nti tagenda kuvuganya mu kalulu ka 2021.
Biriggwa agambye nti asazeewo ateeke ekibuga mu njogera y’ekibiina eya ‘One Uganda One People’ era kiyambe n’okunyweza obumu mu kibiina.
“ Njagala Amuriat olugendo luno alutwale mu maaso, ndabye nga w’amaanyi ajja okusobola okuvuganya Museveni.” Biriggwa bw’agambye wakati mu mizira egibadde gimukubirwa.
Kino kiwalirizza Amuriat okwoza ku mmunye n’ategeeza nti mu kusooka yali teyeesiga Biriggwa era ng’alowooza nti ayinza okukwata ekibiina n’akiwa Museveni, naye akizudde yali mukyamu ku nsonga eno.
Bannakibiina bangi baali basuubira Dr. Kizza Besigye okuddamu avuganye okutuuka mu mwezi Gwomunaana, bwe yakabatema banoonye omuntu omulala era FDC n’etandika omuyiggo.
Wabula ag’omu nkuubo galaga nti FDC eyogerezeganya n’ekibiina kya National Unity Platform (NUP) okugatta amaanyi baleete omuntu omu avuganye Pulezidenti Museveni era bamuggye mu ntebe.