Bya Ssemakula John
Kyengera – Busiro
Abaana n’abazzukulu mu kika ky’Ekkobe bakubiriziddwa bongere okuwagira emirimu gy’ekika ng’emu ku nteekateeka z’okuyitamu okusobola okuzza Buganda ku ntikko.
![](https://gambuuze.ug/wp-content/uploads/2020/11/WhatsApp-Image-2020-07-15-at-2.01.52-PM-1024x683.jpeg)
Obubaka buno, abazzukulu bwabaweereddwa Omukubiriza w’olukiiko lw’abataka omuggya era Omutaka w’Ekika ky’ Ekkobe, Augustine Nsereko Mutumba, bwe yabadde ku mukolo gw’okumuyozaayoza olwa Beene okumulengera n’amulondobayo jjo ku Lwomukaaga e Kyengera.
Omutaka Mutumba yaasinzidde ku mukolo guno n’avumirira ebikolwa by’ebitongole by’ebyokwerinda, okulumba Obutaka bw’ekika ky’Embogo nebataataaganya emikolo gy’okusabira Jjajja Kayiira Gajuule, n’asaba kino kikome mbagirawo.
Ate ye Katikkiro w’ekika ky’Ekkobe, Lawrence Nsereko, yasabye abazzukulu okwerabira entalo ezibadde mu kika kyabwe naye beegatte okulaba nga bazimba ekika kyabwe nga bali kitole.
Abazzukulu abeetabye ku mukolo guno baasonze ssente ezigenda okuyambako mu nteekateeka ey’okuzimba ennyumba ya Jjajja ku butaka bw’ekika kino e Buzimwa.