Bya Musasi Waffe
Kampala
Poliisi ezzeemu okugobagana n’abeekalakaasa mu bitundu bya Kampala okuli; Mulago, Kawempe ne Wandegeya, nga baagala poliisi eyimbule Pulezidenti wa National Unity Platform (NUP) Robert Kyagulanyi Ssentamu (Bobi Wine).
![](https://gambuuze.ug/wp-content/uploads/2020/11/bOI.png)
Kyagulanyi yakwatiddwa eggulo ku Lwokusatu okuva e Luuka, n’aggalirwa e Nalufenya mu Jinja olw’okumenya ebiragiro by’akakiiko k’ebyokulonda ebigendereddwamu okutangira ekirwadde kya Ssennyiga Corona.
Abawagizi ba Kyagulanyi okuli aba boodabooda, abooza emmotoka n’abantu abalala be bamu ku bakedde okubanja Kyagulanyi okuyimbulwa awatali kakwakkulizo konna.
Poliisi wadde yalabudde abantu okukomya okwekalakaasa n’okwokya ebipiira, bano bakedde kuggala nguudo e Mulago n’e Wandegeya wakati mu poliisi okugezaako okubagumbulula.
Abantu abasoba mu 50 bagambibwa okuba nti be batwaliddwa mu ddwaliro e Mulago nga bakoseddwa ttiyaggaasi.
Abamu ku beekalakaasizza, Arnold Tumwine, asabye Pulezidenti Museveni okulagira Kyagulanyi ayimbulwe mu bwangu kuba talina musango gwe yakoze.
Bizineensi ku luguudo lwa Kampala –Gayaza ng’eno ye wasangibwa amaka ga Kyagulanyi, zisanyaladde olw’abatuuze mu kitundu kino okukeera okubanja Bobi Wine, ne bano bookezza ebipiira n’okuggala enguudo okuviira ddala ku Kaleerwe okutuuka e Kasangati.
Emmotoka ezitambula ku luguudo luno ntono nnyo era ng’abamu ku basuubuzi balabiddwako nga batudde wabweru w’amaduuka gaabwe.
Ku ssaawa 4:30 poliisi, n’amagye bisazeeko obutawuni ku luguudo luno era ne bagobaganya abamu ku bavubuka ababadde bagambibwa okukuma omuliro mu nguudo.
URN