Bya Ssemakula John
Kampala
Minisita w’ebyobulamu mu Bwakabaka bwa Buganda, Owek. Dr. Proseperous Nankindu akunze ab’ebyobulamu mu ggwanga okubeegattako okulaba nga baggusa omulamwa gwa Ssaabasajja Kabaka ogw’okulwanyisa ekirwadde kya Mukenenya.
Bino Minisita Nankindu yabyogeredde mu kutegeeza eggwanga ku nkyukakyuka ezikoleddwa mu nteekateeka y’ebyoto ezibadde ez’okubaawo enkya ku Ssande ezikyusiddwa ne zidda ku Lwomukaaga olujja nga 27/11/2021.
Minisita Nankindu yannyonnyodde nti Minisitule y’ebyobulamu mu gavumenti eyaawakati nayo esaanidde okukunga abantu baayo abakulira eby’obulamu ku mitendera gino gyonna okwetaba mu nteekateeka y’ebyoto okusobola okutuukiriza ekiruubirirwa ky’okumalawo ekirwadde kya Mukenenya mu mwaka gwa 2030.
Ono yalagidde abaabadde baweereddwa obuvunaanyizibwa okubangula abantu ku miruka n’amagombolola, okukiika Embuga bamanye ebisingawo ku nsonga eno n’okwongera okukuguka ku ngeri gye basobola okusomesaamu abavubuka bano.
Kinajjukirwa nti buli mwaka wabaawo enteekateeka y’ekyoto mu masaza n’eggombolola n’emiruka egy’enjawulo, Obwakabaka mwe bubangulira abavubuka ku ngeri gye basobola okwekuumamu ekirwadde kya Mukenenya n’okwejjanjaba, singa bubeera bubakutte.