Bya Ssemakula John
Bulange – Mmengo
Ssaabawolereza wa Buganda era Minisita wa Gavumenti ez’Ebitundu, Christopher Bwanika, asabye bannabyanjigiriza mu Buganda ne Uganda okukolera awamu era bongeremu amaanyi mu mirimu gyabwe, basobole okuganyula abantu ba Kabaka.
![](https://gambuuze.ug/wp-content/uploads/2021/03/vlcsnap-2021-03-17-21h57m02s276-1024x576.png)
“Obukulembeze bwetaaga okukolera awamu ne ttiimu gy’otwala ate ggwe nga omukulembeze kikukakatako okulaba nti ttiimu yo yonna etuukiriza emirimu egiba gibaweereddwa.” Owek. Bwanika bw’alambuludde
Ssaabawolereza okwogera bino asinzidde ku mukolo ogw’okukyusa Ssentebe w’olukiiko lw’ebyenjigiriza mu Minisitule y’ebyenjigiriza mu Bulange Mmengo olwaleero. Kino kiddiridde Ssaabasajja Kabaka okusiima abadde ssentebe w’olukiiko luno, Cotilida Nakate, n’amuwa obuvunaanyizibwa obulala mu lukiiko lwa Buganda era n’amusikiza Deborah Zaweddde Ssetyabule okumuddira mu bigere.
Bw’abadde ayaniriza ssentebe omuggya, Owek. Bwanika akuutidde abaweereza mu Minisitule eno okunyweza obumu, kisobozese okutumbula ebyenjigiriza mu Buganda. Owek. Bwanika agambye nti Ssaabassajja Kabaka wa Buganda ky’aluubirira kwe kulaba ng’abaana ba Buganda babangulwa ekimala era wano w’asinzidde n’asaba ssentebe omuggya okuweereza n’obumalirivu awatali kutiiririra Ssaabasajja Kabaka.
Minisita avunaanyizibwa ku by’enjigiriza n’enkulaakulana z’abantu ba Kabaka, Owek. Prosperous Nankindu, atenderezza emirimu egikoleddwa ssentebe omukadde era n’asuubiza okutambula obulungi ne ssentebe omuggya.
Abadde Ssentebe Cotilida Nakate ategeezezza nti wadde Ssennyiga Corona yatabula emirimu, baateekawo amakubo amalala okulaba ng’abaana basigala basoma mu muggalo era baliko ebintu amakula bye basobodde okutuukako.
Ye ssentebe omuggya, Deborah Zawedde Ssetyabula, yeeyanzizza Ssaabasajja Kabaka obuvunaanyizibwa obumuweereddwa era n’awera okuweereza Kabaka obuteebalira nga yeeyambisa obukugu bw’alina okuggusa ekiruubirirwa kya Beene .
Ssentebe avuddeko Cotirida Nakate obuweereza buno yabutandika mwaka guwedde nga 12 omwezi Ogwokubiri.