Bya Noah Kintu
Ssembabule
Abatuuze n’abavuganya ku bifo by’obwakkansala ku disitulikiti ye Ssembabule beemulugunyiza ku kakiiko k’ebyokulonda mukitundu kino okwongerayo okulonda.
![](https://gambuuze.ug/wp-content/uploads/2021/01/a-1024x576.png)
Olunaku lw’eggulo bano baakedde mubifo webalina okulondera era nga n’abebyokwerinda babadde bataka ku bifo bino okulabanga abantu balonda abakulembeze baabwe mu mirembe.
Abamu ku bavuganya okuli; Sisiro Joseph Salongo Joseph, Umar Maseruka kwosa ne Wuudu Sebalamu bagambye nti entabwe yavudde ku kakiiko k’ebyokulonda okuddibaga amannya n’obubonero bw’abeesimbyewo nga owa NUP bamuwadde kabonero ka bbaasi ekireseewo okutabulwa.
Bano bategeezezza nti kino kibayisizza bubi kuba babadde bamaze dda okusasula abantu baabwe abalina okukuuma akalulu nga kati balina kuddamu kubasasula nate.
Balayidde okulumba abakakiiko kabaliyirire ensimbi zaabwe zebamaze edda okusaasaanya era nebasaba akakiiko okuteekawo olunaku olulala era balulange abantu basobole okulutegeera.
Wabula ate abamu ku batuuze okuli Fred Lubuto era beekokodde amagye amangi agaleeteddwa mukitundu kyabwe okukuuma akalulu nga bagamba nti akalulu k’obwakkansala kandibeeramu ebirumira.
Wakati wa bino byonna ye Patrick Nkalubo eyeesimbyewo ku kkaadi ya NRM agamba nti banne tebalina kutya olw’ensobi ezabaddewo nabasaba okwesiga akakiiko wadde nga asuubira okuwangula munne Jjugu Migadde bwebali mu kalulu kano.
Ate ye akulira okulonda mu disitulikiti eno, Mbaine Robert yakakasizza nga bwebaliko kyebakola okutereeza embeera wadde nga tamanyi lunaku lutongole akalulu lwekagenda kubaawo kyokka nga yasabye abantu okusigala nga bagumikiriza.