Bya Betty Namawanda
Kyotera – Buddu
Abantu ba Ssaabasajja Kabaka abawangaalira mu ssaza ly’e Buddu naddala mu disitulikiti y’e Kyotera balaze okunyolwa olw’okusosolebwa gavumenti ne batafuna mukisa kufuna ku ssente zakudduukirira bantu abakoseddwa ekirwadde kya Covid-19.
Kino kiddiridde gavumenti okulangirira okuyamba abantu abakoseddwa omuggalo naddala abo abakola emmere ya leero ng’eyita mu kubawa ssente ku ssimu zaabwe nga bano okusinga bali mu Wakiso, Kampala ne Munisipaali ezimu.
Omubaka w’essaza ly’e Kyotera mu Palamenti, John Paul Lukwago Mpalanyi ku lwa bannakyotera agamba nti, buno busosoze bwennyini kubanga abantu mu bitundu ebitali bya Munisipaali nabo tebakyakola olw’omuggalo.
Mpalanyi bino yabyogeredde ku wooteeri ya Maria Flo mu Masaka n’asaba gavumenti okomye okusosola mu bantu baayo.
Mu ngeri y’emu omubaka Mpalanyi alaze okutya olw’engeri gavumenti gy’ekuttemu ensonga y’ebyobulimi obuyimirizaawo eggwanga n’agamba nti enteekateeka eno ebuliramu ddala, kuba ebiriwo tebirina gwe bisikiriza ku bwenyigiramu.
Ono yannyonnyodde nti akaseera katuuse gavumenti efune abakugu abasooka okukebera ettaka ly’omulimi ne bamanya birime ki ebisobola okudda ku ttaka lino, kibayambe obutafiirwa.
Mpalanyi agamba nti ye ng’omubaka agenda kutandika okugikolera abantu be kibayambe obuteetundako ttaka era basobole okukungula ekiwera.
Ku bbula ly’emirimu erisusse, Mpalanyi omusango agutadde ku gavumenti gy’agamba nti etunula butunuzi ng’amakolero agasukka mu 50 mu kitundu kye ekya Kyotera gasaanawo mu kifo ky’okugayambako.
Mpalanyi yasabye abakulembeze okulaga abantu ekituufu eky’okukola era n’okubayambako mu kifo ky’okubasimbisa ennyiriri ne babagabira omuceere n’ebintu ebirala nti, kino kikontana n’obuwangwa bwa Buganda.