Bya Jesse Lwanga
Mukono
Abatuuze wamu n’abasuubuzi b’e Kikooza mu kibuga Mukono, baggadde oluguudo oluva ku katale ka Kame Valley akamanyiddwa nga Kikko okudda e Wantoni, ng’entabwe evudde ku kumala Ssabbiiti nnamba nga tebalina masannyalaze.
![](https://gambuuze.ug/wp-content/uploads/2020/10/IMG-20201027-WA0069-1024x768.jpg)
Bano okuli; abookya ebyuma, abatunda amata, ab’ebyokunywa, aba Saluuni n’abakola Ice, bategeezezza nti bafiiriddwa obukadde n’obukadde bwa ssente ate nga nazo si zaabwe kubanga baali baazeewola mu bibiina era nga kati tebamanyi kyakukola.
Abatuuze bano bawadde ekitongole kya UMEME nsalessale ya lunaku lumu era nga lwe lwaleero okuzzaako a masannyalaze gaabwe oba si ekyo baakukolawo ekisinga ku kino.
Balumirizza nti ng’oggyeeko eky’ebintu bye bakozesa okwonooneka, naye n’ebintu ebikozesa amasannyalaze omuli Fridge, Radio, ne TV kubanga buli lwe gabaddenga agaagala okudda nga gamyansa negookya ebintu byabwe.
Embeera yeeyongedde okubeera ey’obunkenke okutuusa aduumira ebikwekweto ku poliisi y’e Mukono, ASP Michael Wadulu, bw’atuuse okukkakkanya abatuuze era n’azikiza omuliro ogubadde gukumiddwa. Abasabye okukomya okukuma omuliro mu nguudo kuba kyonoona kkolaasi.
Wadulu abasuubizza okukwatagana n’aba UMEME okulaba ng’ekizibu kino kikolebwako mu bwangu. We tukoledde eggulire lino nga poliisi ekyagumbye mu kifo kino okutangira abasuubuzi okuddamu okuziba ekkubo lino.
Kaweefube waffe okwogerako n’omwogezi w’ekitongole kya UMEME oluvannyuma lw’obutakwata ssimu ze ezimanyiddwa, agudde butaka.