Bya Musasi Waffe
Kalangala – Ssese
Abakulembera essaza lya Kabaka ery’e Ssese basabye abaayo okujjumbira okugaba omusaayi kiyambeko okutaasa obulamu bwabo abagwetaaga kuba teriiyo kkolero lyagwo wadde gye bagulima.
Okusaba kuno kukoleddwa Omukubiriza w’olukiiko lw’essaza lya Ssaabasajja Kabaka ery’e Ssese, Omuk. Njuba Livingstone bw’abadde ku mukolo gw’okubangula abantu ku bwetaavu bw’okuwaayo omusaayi n’abasaba okujjumbira enteekateeka za Buganda ez’okugaba omusaayi.
Ye akiikiridde omwami w’essaza lino, Kweba Roy Dembe Nakiboneka alaze obukulu obuli mu kuwaayo omusaayi naddala mu disitulikiti y’e Kalangala kuba mu malwaliro teguliiyo nga weetaaga okubaawo ekikolebwa.
Kinajjukirwa nti enteekateeka eno e Ssese egendereddwamu okukung’anya yuniti z’omusaayi eziwera 800 era nga guno gwe mulundi ogwokutaano ng’ekolebwa mu Kalangala okuva mu mwaka gwa 2018.
Omukungu w’ekitongole ekikung’aanya omusaayi ekya Uganda Blood Transfusion Services e Masaka, Tulyeheebwa Johnson agamba nti ekitongole ky’ensi yonna eky’ebyobulamu kyawa Uganda amagezi okukung’aanya Yuniti z’omusaayi emitwalo 44 buli mwaka okusobola okukendeeza ku bbula ly’omusaayi naye kino kikyali kizibu n’asaba abantu okujjumbira enteekateeka eno.
Wano amyuka Ssentebe wa disitulikiti y’e Kalangala, Resty Nakawungu w’asabidde abakyala okujjumbira enteekateeka eno kubanga be bagikulembeddemu ate nga be basinga okuganyulwa.
Akulira ekitongole kya Kalangala Infrastructure Services Limited, John Opondo, agamba abantu bangi abeetaaga omusaayi nga y’ensonga lwaki beewaayo okuwagira enteekateeka eno buli mwaka. Asabye abantu okumanya nti wadde COVID-19 yasinga okuvuga naye n’endwadde endala zikyaliyo.