![](https://gambuuze.ug/wp-content/uploads/2020/01/Royal-2-1024x683.jpeg)
Musasi Waffe
Abayizi 1050 olwaleero batikkiddwa ku ttendekero lya Kabaka erya Buganda Royal Institute of Business and Technical e Kakeeka Mmengo. Kubano, abayizi 431balenzi ate abawala bali 613 nga bafunye amabaluwa ga satifikeeti wamu ne dipulooma. Nga ayogerako eri abayizi n’abazadde, Katikkiro Charles Peter Mayiga agambye nti olwaleero olugendo lwabwe lutandise.
“Okutikkirwa si y’enkomerero, obuwanguzi lugendo, yenna atikkiddwa ateekwa okuba n’ekiruubirirwa era olina okukirondoola kubanga omuntu nga anaawangula abaako n’ebifananyi byakuba mu meeme ye nabiremerako; omusana gwaka, enkuba ettonnya, kibuyaga akunta, nga alondoola ekiruubirirwa ekyo. Yadde muyize emirimu gy’emikono naye bwoba osobola okufuna omulimu sooka ogufune kubanga wetaaga okuyiga ebyensi,” Mayiga bwagambye.
Agumizza abayizi nti newankubadde ebisoomooza bingi, bateekeddwa okuba abamalirivu okubyengaanga . Abasabye obumalirivu bweboolesezza mu kusoma babukozese okusobola okukola ebintu ebigasa ensi yaabwe.
![](https://gambuuze.ug/wp-content/uploads/2020/01/Royal-1024x683.jpeg)
Ku lulwe Oweek. Prosperous Nankindu Kavuma, Minisita avunanyizibwa ku by’enjigiriza asiimye nnyo Ssaabasajja Kabaka olw’okutandika ettendekero lino lyagambye nti likoze omulimu gwamanyi okusomesa abaana b’eggwanga. Nankindu ayozaayozezza abayizi bonna abatikiddwa olw’okussaayo omutima okutuuka ku buwanguzi buno.
![](https://gambuuze.ug/wp-content/uploads/2020/01/Royal-4-1024x683.jpeg)
“ Twebaza abo abakulira ettendekero lino olw’omulimu gwemukola omunene. Ettendekro lino lisomesa abaana okukola era okubeera ekyo kyebasomye. Bw’omala okusoma tetwagala kumanya wa gye wasomera wabula butya bw’okwatamu okusoomooza okwenjawulo kw’ofuna wamu n’enkolaganayo n’abantu abalala. Singa obikola bulungi abantu bajja kubuuza wa gyewasomera era kino kijja tuweesa ekitiibwa,” Nankindu bwagambye.
![](https://gambuuze.ug/wp-content/uploads/2020/01/Royal-3-1024x683.jpeg)
Akulira ettendekero lino Omukungu Anthony Wamala alambuludde ku biki byebayiseemu n’obuwanguzi bwebatuuseeko. Agambye nti buli mwaka omuwendo gwabayizi gweyongera ekiraga nti abantu babesiga.
Gano gabadde matikkira ga mulundi gwa14 era ng’omuyizi Prisca Nakafeero yasinze banne ng’abadde asoma Cosmetology.