Bya Betty Namawanda
Bukomansimbi – Buddu
Ssentebe wa distulikiti y’e Bukomansimbi, Muhammad Kateregga, akalaatidde abakulembeze abayiseemu mu kitundu kino okwewala entalo naye beegatte bakolere abantu ababalonze awatali kusosola.
![](https://gambuuze.ug/wp-content/uploads/2021/03/Kateregga-2-1024x685.jpg)
Kateregga okwogera bino abadde asisinkanye abakulembeze abaggya ku kitebe kya disitulikiti y’e Bukomansimbi okubalambika mu ebyo bye boolekedde mu bukulembeze bwabwe ssaako okubalaga ebituukiddwako.
Ssentebe omulonde owa National Unity Platform, Fred Nyenje n’abakiise abaggya ku disitulikiti eno, balambuzibwa pulojekiti ezikoleddwa okuli essomero lya Bukango Seed Secondary School eryazimbiddwa gavumenti.
Okusinziira ku bakulu, essomero lino lyamazeewo ssente ezikunukkiriza obuwumbi 2. Ssentebe Kateregga yasabye bano okufuba okulaba nti essomero lino baliteekako bbugwe era bakuume n’ebyo ebikoleddwa.
Bano era beeyongeddeyo mu ggombolola y’e Butenga okulambula pulojekiti y’amazzi aga Solar, gavumenti ge yateekayo ku buwumbi 10. Akulira ekifo kino, Ezel Kaggwa, yagambye nti mu kiseera kino abantu abasoba mu mitwalo mukaaga (60,000) be bakozesa amazzi gano wadde wakyaliwo ebisoomooza.
Beeyongeddeyo ku ddwaliro lya Butenga Health Centre IV era Ssentebe Kateregga n’agamba nti balina ekirowoozo ky’okufuula eddwaliro lino eddene. Mu kwogera kwe, ssentebe omulonde, Fred Nyenje, yeebazizza olukiiko lwa disitulikiti olukadde olw’enkulaakulana gye bakoze mu Bukomansimbi.
Bo bakkansala abalonde beebazizza enteekateeka Ssentebe Kateregga gy’akoze ey’okubalambuza pulojekiti ezikoleddwa era ne basuuubiza okwongera okugitwala mu maaso.