Bya Ssemakula John
Kampala
Ssentebe w’omukago gwa East Afirika era Pulezidenti wa Kenya, Uhuru Kenyatta alagidde eggye ly’omukago guno erya East African Standby Force okuyingira munda mu ggwanga lya Congo bayambeko ku ggye ly’eggwanga eryo okwetakkuluza ku bayeekera abongedde okuwamba ebitundu mu Congo.
Abajaasi b’ omukago guno amakanda bagenda kugasimba mu bitundu okuli North Kivu, South Kivu awamu ne Ituri ng’eno abayeekera ba M23 abaagala okumamulako obukulembeze bwa Felix Tishekedi gyebasinza amaanyi.
Uhuru Kenyatta mu kiwandiiko kyafulumizza, agambye nti obutali butebenkevu mu buvanjubwa bweggwanga lya DRC mu bitundu bye Ituri ne Kivu butadde ebyokwerinda by’amawanga gannamukago mu katyabaga nga weetaaga okubaawo ekikolebwa.
Okusinziira ku Kenyatta kyebagenda okukola ng’eggye ly’omukago kwekuggya eby’okulwanyisa n’emmundu ku bantu bonna ababirina awatali lukusa kuva mu gavumenti ya Congo kuba kino kyekisinze okuvaako obukubagano mu kitundu kino.
Guno gwemulundi ogugenda okuba ogusoose ng’amawanga gano gakolera wamu, okuva abakulembeze lwebaasalawo okutondawo eggye eryawamu.
Kinajjukirwa nti mu mwezi ogwokuna omwaka 2022, abakulembeze b’amawanga ga East Africa mu nsisinkano eyali e Kenya ,baalagira obubinja bwabayeekera okussa wansi ebyokulwanyisa babiweeyo eri gavumenti ya DR Congo wabula nebeerema.
Bino webijjidde nga omukago guno gwetemyemu oluvannyuma lwa gavumenti ya Congo okulumiriza Rwanda okuwagira abayeekera ba M23 ababadde bakamala okuwamba ekitundu kye Bunagana ku nsalo ya Congo ne DR Congo.
Rwanda nayo nnaku ntono eziyise yalumiriza amaggye ga DRC okuwamba abajaasi b’eggye lya Rwanda , nookusindiika ebikompola mu Rwanda.
Wetwogerera kizibu okumanya oba gavumenti ya Rwanda enaasindiika amaggye gaayo okwegatta ku maggye gannamukago, okwanganga abayeekera ba M23.