Bya Ssemakula John
Bulange – Mmengo
Abaweereza ba Ssaabasajja Kabaka Ronald Muwenda Mutebi II basomeseddwa ku ndwadde ez’enjawulo awamu n’enteekateeka ya Yinsuwa y’ebyobulamu n’engeri gyesobola okukolamu.
Omusomo guno gubadde mu lusiisira lw’ebyobulamu olutegekeddwa e Bulange e Mmengo ku Lwokutaano nga lwategekeddwa aba Weerinde Insurance ne Case Medicare.
Olusirika luno lugguddwawo omukubiriza w’Olukiiko lwa Buganda, Owek. Patrick Luwaga Mugumbule, ku lwa Katikkiro naasaba abantu yonna gyebali okuyiga okwekebeza endwadde bazuule embeera y’obulamu bwabwe era bakole dduyiro okusobola okukuuma emibiri gyabwe nga miramu.
Ye minisita w’Ebyobulamu n’Embeera z’abantu mu Bwakabaka, Owek. Prosperous Nankindu Kavuma, akubirizza abantu okwefaako mu byobulamu nga tebannafa ku balala era beekebeze basobole okuziyiza endwadde.
Omuwandiisi ow’Enkalakkalira mu Woofiisi ya Katikkiro, Omuk. Josephine Nantege, yeebazizza nnyo Ssaabasajja Kabaka olw’okusiima n’awa abaweereza obujjanjabi obw’obwereere nebasobola okumanya obulamu bwabwe bwebuyimiridde.
Abasawo nga bakulembeddwamu Dr. Kenneth Agaba, owa Case Hospital, babangudde abaweereza ku nsonga z’ebyobulamu ez’enjawulo, n’oluvannyuma ne wabaawo okukebera abantu endwadde ez’enjawulo n’okubalaga bwebasobola okuzeekuuma.