Bya Gerald Mulindwa
Omwami wa Kabaka amulamulirako e Ssaza Kyaddondo, Kaggo, Oweek Hajji Ahmed Magandaazi Matovu, akubirizza abantu ba Kabaka okuwagira polojekiti z’Abantu abajjumbira enteekateeka z’Obwakabaka.
Kaggo asinzidde mu lusiisira lw’ebyobulamu olutegekeddwa ku People’s Hospital e Gayaza, nga ebimu ku bikujjuko by’okujjukira amatikkira ga Kabaka aga 33 nga alamula obuganda.
Olusiisira luno luwoomeddwamu omutwe Rotary club ye Gayaza ne banna Rotary okuva mu bibiina eby’enjawulo, n’ekigendererwa eky’okujjanjjaba abantu ba Buganda naddala mu Ssaza Kyaddondo. Abantu bafunye obujjanjabi ku ndwadde ezitali zimu okuli; sukaali, kookolo, n’okukebera akawuka akaleeta mukenenya, ssaako n’okugaba omusaayi.
Dr. Frank Ndugga, akulira People’s hospital Gayaza, yebazizza obuwagizi bwa Minisitule y’ebyobulamu eri enteekateeka eno, ne bannamikago abadduukiridde kaweefube wa Beene ow’okukakasa nti Abantu be babeera balamu bulungi. Eno, Kaggo atongozza n’okugaba endokwa z’emiti 2000 ezaweereddwayo banna Rotary.