Bya Musasi Waffe
Kitende
Abasambi 13 beebavudde mu ttiimu ya Vipers SC wakati nga ttiimu ez’enjawulo zeeteekateeka okuddamu okulwanira ekikopo mu Uganda Premier League sizoni ejja.
Okusinziira ku kibanja kya ttiimu eno ku mutimbagano , abamu ku basambi abateereddwa endagaano zabwe zibadde ziweddeko ate nga abalala bakkiriziganyiza ne ttiimu batambulemu.
Obubaka obuli ku mutimbagano (Website) gwa ttiimu eno bulaze nti, “ Vipers SC ekakasizza nga abasambi abawerako bwebavudde mu ttiimu eno wakati mukukiriziganya kiyambe omutendesi Fred Kajoba okutegeka ttiimu erina okusamba sizoni ejja.”
Ku bano kuliko; omusambi Brian Nkuubi abadde ku kiraabu eno okuva mu 2015 bwebamugula okuva mu Kira Young, Omukwasi wa ggoolo Derrick Ochan, Dan Barikiwulira, Janjali Joseph, Dickens Okwir, Ibrahim Kiyemba ne Duncan Seninde.
Abalala kuliko; Farouk Musisi, Tom Masiko, Steven Mukwala , Tito Okello, Fred Atuhwera ne Baden Mujahid.
Vipers esuubira okuwaayo omusambi Brian Kalumba ku bbanja wadde nga tekinamanyika ttiimu ki emutwala.
Bino webigidde nga Vipers yamaze okufuna abasambi abapya omuli; Disan Galiwango okuva mu Express, Ibrahim (Mbarara City), Jamil Kalisa (Bright Stars) ne David Bagoole (Busoga United) bagiyambe okwenyweza mu sizoni ejja.
Sizoni eyaggwa Vipers yamalira mukifo kisooka ne n’obubonero 54 nga yasinza ku KCCA FC obubonero buna (4) okusitukira mu kikopo kya liigi.