Bya Miiro Shafik
Mmengo – Kyaddondo
Bannakisinde ki Republican Front bakiise Embuga mu Bulange e Mengo ne beyanjula n’enteekateeka ze balina mu by’obufuzi bya Uganda.
Ku lwa Katikkiro, Minisita w’Amawulire n’Okukunga Abantu era Omwogezi w’Obwakabaka, Owek. Israel Kazibwe Kitooke y’asisinkanye Bannakisinde ki Republican Front okubadde Bbira Henry Kisakye Ssentebe waakyo ne Ssenoga Elvis, Ssaabawandiisi.
Owek. Kazibwe mu bubaka bwe bano asoose kubajjukiza nti Ssaabasajja Kabaka yakubirizza abavubuka okwetaba mu by’obukulembeze n’okulwanirira omugabo gwa Buganda bwatyo n’abeebaza okwesowolayo okuvuganya, kyokka abasabye ke basazeewo okubiyingira babeere bamalirivu n’obwerufu mu byonna bye bakola, baleme kuva ku mulamwa era bagoberere obubaka bwa Beene buli kiseera.
Minisita Kazibwe bano abeebazizza olw’ebirowoozo bye balina mu bukulembeze obulimu okugabana obuyinza (Federo) bw’agambye nti Buganda twakomyanga kubulwanirira kubanga buyamba buli kitundu okwekolera ku nsonga zaakyo olwo eggwanga ne likulaakulana. Abasabye okulondoola amakubo mabi, ebyobujjanjabi ebitali birungi, ebyenjigiriza n’ebirala kibayambe okukola ku nsonga eziluma abantu
“Mufeeyo nnyo ku nsonga eziruma abantu, kubanga baweddemu essuubi eri Bannabyabufuzi, anti buli afuna obukulembeze n’obuyinza taddamu kuwuliriza bantu baamulonda, kino kireseewo okuyaayana mu bantu okufuna abakulembeze ab’ensa” Minisita Kazibwe
Minisita Kazibwe bano abeebazizza okukiika Embuga era n’abaagaliza okuvuganya obulungi nga tebeerabidde nsonga zikwata ku bantu.
Ssentebe w’ekisinde kino Bbira Henry Kisakye ategeezeza nti ensonga enkulu abaleese Embuga kwe kwanjula enteekateeka zaabwe ze balina mu byobufuzi bya Uganda era n’okusaba okutambula n’Obwakabaka mu buweereza bwabwe. Ategeezeza nti batunuulidde okusoosowaza ensonga ezikwata ku bantu n’okuweereza obulungi abantu. Ono era ategeezeza nti ate baakwongera okusoosowaza ensonga za Buganda singa baweebwa obukulembeze.
Bbira asabye Bannabyabufuzi banne naddala ebibiina okuleeta Bannabyabufuzi abategeera ebitundu bye baagala okukulembera, ono akikaatiriza nti oyo ategeera ekitundu era y’asobola okukiweereza obulungi. Bwatyo asuubiza nti bbo nga Banna-Republican bakuteeka abakulembeze ab’enjawulo okuvuganyiza mu bifo gye bava era bye bategeera obulungi.