Bya Ssemakula John
Njeru
Abakungu b’ekibiina ekifuga omupiira mu ggwanga ekya Uganda Football Association awamu n’akakiiko akategesi ak’empaka z’amasaza ez’omwaka guno, balambudde ekisaawe kya FUFA Technical Centre e Njeru, ne bakakasa omutindo gwakyo n’obusobozi bw’okukyaza empaka zino.
“Enteekateeka ku kisaawe buli kimu kiri bulungi era ekisaawe kyeyongeddeko ku mutindo okusinga bwe kyali omwaka oguwedde. Era buli kimu kikwatagana bulungi nnyo n’enteekateeka yaffe ey’omwaka guno okulaba nti tubeera n’empaka eziri ku mutindo okusingako omwaka oguwedde.” Omuk. Ssejjengo bw’ategeezezza.
Okusinziira ku Ssejjengo, baalabye abazannyi, abakungu awamu ne badiifiri we bagenda okusula era ne bakakasa enteekateeka y’omupiira ogunaggulawo empaka zino ogwa nga 20 Novemba nga Gomba, esamba Kyaddondo era Beene y’agenda okugiggulawo.
Ono annyonnyodde nti tebagenda kukkiriza bawagizi mu kisaawe olw’ekirwadde kya Corona naye n’akakasa nti enteekateeka y’okugulaga ku ntimbe za TV yaakoleddwako era nga buli kimu kigenda kuba kya mutindo n’abasaba okusigala nga bagumiikiriza.
Amyuka atwala omupiira mu FUFA, Decolas Kizza ategeezezza nti tebagenda kutaataaganya ttiimu zibadde zikozesa kisaawe okuli; Busoga United ne SC Villa bajja kusigala nga bazannya kuba enteekateeka ekoleddwa bulungi.
Bannantameggwa b’empaka zino ab’omwaka oguwedde aba Gomba baakuzannya Ssingo ate Kyaddondo ekwatagane ne Kabula awamu ne Buluuli mu kibinja kya Masengere. Buddu Mawogola, Busujju, Buweekula ne Butambala bali mu kibinja kya Muganzirwazza.
Mu kibinja Bulange; Busiro, Bugerere, Kyaggwe ne Buvuma ate Butikkiro mulimu; Bulemeezi, Kkooki, Mawokota ne Ssese.