Bya Noah Kintu
Ssembabule
Abatwala eddwaliro lya Health Centre IV erisangibwa mu disitulikiti y’e Ssembabul, bali mu kattu olw’ebbula ly’amasannyalaze agamalidde ddala wiiki bbiri nga tegaliiko nekisannyalaza emirimu ku ddwaliro lino oluvannyuma lw’ogasalako.
![](https://gambuuze.ug/wp-content/uploads/2021/03/IMG_0444-2-1024x683.jpg)
Kino kitabudde abalwadde, abasawo n’abakulembeze mu kitundu era olunaku lw’eggulo RDC w’ekitundu kino, Hajji Walugembe Ramathan n’abamu ku bakulembeze, baakubye olukiiko ku ddwaliro lino okusalira ekizibu kino amagezi.
Omu ku Ddokita abasangiddwa ku ddwaliro lino, Gilbert Akampulira, yategeezezza nti wadde abasawo bakyagenda mu maaso okugezaako okukola naye kino ekizibu kyamaanyi kuba bali mu kibululula era abakyala abeetaaga okulongoosebwa n’abamu abalina okukeberwa omusaayi, tebakyafuna bujjanjabi mu budde.
Ono agasseeko nti eddagala lingi lifiiridde mu ffiriigi era wano Mmeeya wa ttawuni kkanso y’e Ssembabule, Jude Kasekende, aloopedde RDC wabeewo ekikolebwa kuba ekitongole kya UMEME kyetaaga okusooka okwogerezeganya n’abatwala eddwaliro mu kifo ky’okusalako amasannyalaze nga tewali gwe beebuuzizzaako.
Bo abatuuze bategeezeza RDC nti wadde waliwo ekizibu kino naye ate weetaaga okubaawo ekikolebwa ku basawo abatuuka ekikeerezi wamu n’okwebulankanya ku mirimu.
Ate ye kkansala wa ttawuni kkanso ya Ssembabule ku disitulikiti yalumiriza akulira eddwaliro lino, Dr. Kawuki Muhammad, okudibaga emirimu era ng’ayitirizza n’okuggya ku balwadde ssente.
Mu kwanukula, Dr. Kawuki yategeezezza nti “Kituufu eddwaliro limaze wiiki 2 nga balisalako amasannyalaze nga tubanjibwa obukadde bw’ensimbi 12 wabula okuwera kwa ssente zino saakumanya kuba nange nkyali mupya ku ddwaliro lino. Ate ne ssente ezibadde zituweebwa gavumenti eyaawakati okuddukanya emirimu zaasaliddwa.”
Dr. Kawuki yannyonnyodde olukiiko nti olw’okuba tebalina ssente basaba abalwadde okwegulira ebimu ku bikozesebwa olwo bo ne bakiyita okubaggyako ssente naye bakikola okusobola okutambuza emirimu mu mbeera eriwo.