Bya Betty Namawanda
Kyotera – Buddu
Akulira abalamuzi ba kkooti esookerwako e Masaka, Charles Yeteise, alayizza abakulembeze mu Disitulikiti okuli Kyotera ne Rakai basobole okuddukanya emirimu egyabatumwa.
Omumyuka wa Ppookino w’essaza Buddu asooka, owek. Rose Nalubowa, yasinzidde wano n’asaba abakulembeze abapya okwewala entalo, wabula bakolere abantu.
Bo bakansala abaalondeddwa beeyamye okukolera abantu baabwe awatali kusosola mu bibiina byabufuzi.
Ssentebe wa disitulikiti y’e Kyotera, Patrick Kintu Kisekulo, yagambye nti asookera ku kuzza bumu ssaako n’okuweereza abantu baabwe.
Ababaka b’ekitundu kino okuli, John Paul Lukwago Mpalanyi ne Fortunate Rose Nantongo baategeezezza nti balina essuubi okulaba ng’obukulembeze obuggya buweereza abantu.
Oluvannyuma Omulamuzi Charles Yeiteise yalondesezza sipiika, nga Agnes Namusiitwa yamegganye ne Lubinga Francis Xavier. Gye byaggweeredde nga Lubinga aliko obulemu awangudde obwasipiika ku bululu 17 ku 15.
E Rakai ekire ky’enkuba kyataataganyizza enteekateeka z’okulayira wabula omukwanaganya w’emirimu gya Ssaabasajja Kabaka e Kkooki, Gertrude Ssebuggwawo yagumizza abalonde nga bw’agenda okukola ekisoboka okulaba nga batambuza emirimu gya Ssaabasajja e Kkooki. Ono era yasabye abavubuka okubeera abavumu mu bye bakola n’agamba nti ye alwanye okukulembera Rakai emyaka 30 okutuusa Omukama w’amwanukudde .
Abadde Ssentebe wa Rakai, Robert Benon Mugabi, agambye nti Rakai balina we bagituusizza mu by’enjigiriza n’abasaba abakulembeze okwongeramu amaanyi.
Oluvannyuma Omulamuzi Yeiteise alayizizza sipiika wa Disitulikiti ye Rakai nga Charles Kadumya Sseggiriinya aliko obulemu yawangudde ku bululu 21 n’amegga banne. John Magalo yafunye obululu 9 ate Derrick Tusubira n’afuna 10.