Bya Ssemakula John
Mbale
Abakulembeze mu Bugisu basabye Pulezidenti Museveni okukulaakulanya eby’obulambuzi mu kibuga Mbale, kisobole okutumbula ekitundu kyabwe.
![](https://gambuuze.ug/wp-content/uploads/2020/11/FB_IMG_16062355962481657-1024x683.jpg)
Mu ndagaano eyaweereddwayo Minisita w’ebyobugagga eby’omuttaka, Mary Goretti Kitutu, abakulembeze mu Bugisu basabye Museveni abazimbire akatale ku nsalo, abakolere enguudo wamu n’okubazimbira olubiri lw’omukulembeze waabwe olwa Inzu ya Masaba.
Mu birala bye basabye mulimu; okutumbula ebyobulimi, abazimbire amakolero wamu n’okubawa amazzi amayonjo awamu nokubawa amalwaliro agamala mu kitundu kino.
Baagala abazimbire ekifo ky’ebyobulamuzi ekya Mutoto Cultural and Tourism Centre era bamusabye abaana baabwe abasomye abawe ebifo ebinene mu gavumenti.
Bwe yabadde ayogerako n’abakulembeze bano okuva e Mbale, Buduuda ne Namisindwa, yabasuubizza okutunula mu nsonga y’okufuula Mbale ekibuga ky’ebyobulambuzi era n’asaba abatuuze okuva ku lusozi Elgon kubanga okubumbulukuka kw’ettaka kufuuse kizibu kinene.
“Nzikanya nammwe ku nsonga y’okukulaakuIanya ekibuga abantu basobole okusenga ku bitundu ebitali ku nsozi baganyulwe mu makolera agazimbiddwa. Olwo eby’obulambuzi tujja biteeka waggulu ku nsozi n’ebibira abantu basobole okuganyulwa mu by’obulambuzi.” Museveni bwe yagambye.
Pulezidenti Museveni yasabye abantu mu Bugisu bakyuse engeri gye balimamu basobole okuganyulwa mu makolero agazimbiddwa mu kitundu kino.
Museveni yabasuubizza okubazimbira olubiri lw’Omukulembeze waabwe era ne yeeyama okukozesa omusolo gwe bawa okulongoosa enguudo mu kitundu kya Bugisu.
Olwaleero Pulezidenti Museveni asuubirwa okukuba enkung’aana mu Sironko ne Bulambuli ku Lwokusatu era nga waakwogerako n’abakulembeze b’ekibiina mu kitundu kino.