Bya Ssemakula John
Bulange – Mmengo
Abantu ba Buganda basabiddwa okunyweza obumu awamu n’okunywerera ku Ssaabasajja Kabaka, beesonyiwe ebigambo ebiyiting’ana bwe baba baagala okubaako bye batuukako n’okuzza Buganda ku ntikko.
Okwogera bino Omumbejja Nassolo abadde atikkula Luwalo mu bimuli bya Bulange e Mmengo nga olwaleero luweredde ddala obukadde musanvu n’emitwalo nsanvu mu mukaaga (7.76).
“Mbakubiriza okukolera awamu musobole okugatta obusobozi bwa buli omu bw’alina okusobola okuzza Buganda ku ntikko. Mbasaba okunywerera ku Kabaka wammwe kuba Katonda gwe yatuwa okutukulembera.” Omumbejja Nassolo bw’abakubiriza.
Omumbejja Nassolo abakubirizza okwettanira enteekateeka z’Obwakabaka basobole okuziganyulwamu kuba ezisinga zeesigamiddwa ku kutumbula embeera zaabwe era n’abasaba okusigala ku bwerinde ku kirwadde kya Ssennyiga Corona ekyongedde okutabula abantu.
Ate ye Minisita omubeezi owa gavumenti ez’ebitundu mu Buganda, Owek. Joseph Kawuki, asabye abaami ba Kabaka okwongera amaanyi mu nteekateeka zonna n’akubiriza abantu obutatiirira Bwakabaka.
Oluwalo luno luvudde mu ggombolola ez’enjawulo okuva e Kyaddondo, Buluuli n’abakulembeze b’abakyala mu Busiro.
Eggombolola zino kuliko; Mumyuka Kakooge, Ssaabaddu Buluuli, Mituba IV Nakasongola, Mutuba I Nakituma ne Lwabiyata.
Eggombolola ya Musaale Busukkuma mu ssaza Kyaddondo y’eridde empanga olwaleero, ng’ereese Oluwalo lwa bukadde busatu n’emitwalo kinaana mu etaano n’eddirirwa eggombolola ya Mumyuka Kakooge ereese akakadde kamu n’emitwalo ebiri.