Bya Samuel Stuart Jjingo
Namirembe – Kyaddondo
Omulabirizi Elia Paul Luzinda Kizito wamu ne maama Omumbejja Florence Wanyana Luzinda bajjaguza emyaka 15 mu bufumbo obutukuvu.
Omukubiriza w’Olukiiko lwa Buganda Owek. Patrick Luwaga Mugumbule, ku lwa Katikkiro Charles Peter Mayiga, ayozayozezza abafuumbo bano olw’okutuuka ku kkula lino nga bino bibadde mu kusaba okuteegekeddwa ku Lutikko e Namirembe okwebaza Katonda.
Okusaba kuno kukulembeddwamu Ssaabalabirizi w’Ekkanisa ya Uganda Rt. Rev. Dr. Steven Samuel Kazimba Mugalu. Mu ngeri yemu, Owekitiibwa akulisizza Omulabirizi Eriya Paul Luzinda Kizito olw’okuweza emyaka 81 egy’obukulu neyebaza Katonda olw’okumukuuma.
“Nnamusa Omulabirizi Elia Paul Luzinda Kizito ne mukyala wo Omumbejja Florence Wanyana Luzinda, era mbayozaayoza okuweza emyaka 15 mu bufumbo obutukuvu. Mu ngeri yeemu njozaayoyoza Omulabirizi Eriya Paul Luzinda Kizito olwokuweza emyaka 81. Mukulikire ddala bannaffe” Katikkiro.
Oweekitiibwa yeebazizza Omutonzi olw’emyaka 81 gy’awadde Omulabirizi kubanga mu myaka egyo, amukoledde ebikulu nkumu ebigwanidde okwebaza, mu naddala obuweereza mu Kkanisa ku mitendera egy’enjawulo okutuukira ddala bwe yafuuka Omulabirizi.
“Obuweereza bwo tebugasizza Kkanisa yokka, kyokka bugasizza Buganda yonna okutwalira awamu, kubanga e Mukono gye yaweerereza ng’Omulabirizi, wali mu Ssaza lya Beene ery’e Kyaggwe. Awonno tukwebaza olw’emirimu ate n’enkolagana ennungi n’Obwakabaka,” Katikkiro.
Mukyala Florence baye yebaziddwa olw’okukuuma omwami we n’okumulabirira emyaka kati 15, ate neeyebaza n’abaana babwe, n’abooluganda bonna abatambudde nabwo ebbanga lino lyonna.
“Owadde eky’okulabirako eri obantu abalala obutaggwamu ssuubi ng’obuzibu buzze. Nneebaza abantu ba Katonda bonna abaakulwanirira yonna gye wayita ng’oli mu buweereza, okuviira ddala ng’oli mwawule,” Katikkiro.
