Bya Ssemakula John
Kampala
Akulira ebikwekweto mu poliisi, AIGP Edward Ochom, alabudde abaduumizi ba poliisi mu bitundu eby’enjawulo naddala mu Kampala, okwerinda bannakibiina kya National Unity Platform (NUP), abagambibwa okutandika okwegugunga olunaku lwaleero.
![](https://gambuuze.ug/wp-content/uploads/2021/03/Poliisis.png)
Mu bubaka bwe obuweerezeddwa eri abaduumira poliisi mu bitundu eby’enjawulo, abasabye okubeera obulindaala okutandika olunaku lwaleero, olw’ebigambibwa nti waliwo ab’oludda oluvuganya abaagala okulemesa Pulezidenti Museveni okulayira.
“Abakessi baffe bazudde olukwe lw’abamu ku b’oludda oluvuganya naddala aba NUP, bategeka okwekalakaasa. Ba RPC, DPC n’abaduumizi bonna abalala balagiddwa okwerinda era bafune buli kimu ekisobola okubayamba okufufuggaza abantu bano.” Ebbaluwa ya Ochom bw’esomye ku Mmande.
Ochom yasabye yalagidde abaduumizi okulawuna ku bigere wamu n’emmotoka era basuule emisanvu ku nguudo ez’enjawulo naddala eziyingira mu kibuga. “Essaawa ya Kafyu erina okukwatibwa n’amaanyi era bakakase nti ebiragiro bya Ssennyiga Corona bigobererwa.” Ochom bwe yategeezezza.
Kino kiddiridde ebipande ebyenjawulo ebyatimbiddwa nga birabula okulemesa okulayira kwa Pulezidenti Yoweri Museveni.
Ebipande bino biriko ebigambo ebisoma nti , “Museveni Tajja Kulayira” era kigambibwa nti byatimbiddwa ab’ekisinde kya ‘Time is Now’ ekivuunulwa nti ‘Eno y’essaawa.’
Ekisinde kino gyebuvuddeko kyategeezezza nti nga kikolagana n’ebibiina by’obwannakyewa wano n’ebweru, kigenda kukola buli kimu okulaba nti Museveni talayizibwa ku lunaku lwa May 12.
Amyuka omwogezi wa poliisi mu Kampala n’emiriraano, Luke Owoyesigire eggulo ku Mmande yategeezezza nti bagenda kukola buli kimu okulaba nti tewabaawo atabula mirembe.