Bya Ssemakula John
Kampala
Ababaka abatuula ku kakiiko k’ebyobulamu mu Palamenti bawakanyiza eky’okuwa abali ku mulimu gw’okuzimba eddwaliro lya Lubowa ensimbi eziwera obuwumbi 2.7 ng’ate tewali mulimu gwamaanyi guliyo.
Bino bibadde mu nsisinkano ababaka mwebasisinkanidde abakulu ba Minisitule y’ebyobulamu ababadde bakuliddwamu Minisita Jane Ruth Aceng bwebabadde baleese embalirira y’ennyongereza eweza obuwumbi 31.8. zebeetaaga okutambuza emirimu.
Minisitule y’ebyobulamu era esabye eweebwe obuwumbi 8 okusobola okusasula abasawo abayambako okulwanyisa ekirwadde kya Corona, obuwumbi 6 baddaabirize ebyuma ebikola omukka gwa ‘Oxgyen’ ate obuwumbi 11.5 ziweebweyo nga eggasi kkooti zeyawa kampuni ya Sino Africa Medicines wamu n’obuwmbi 3.6 baziwe eddwaliro lya Busolwe General Hospital.
Bano era baagala obuwumbi 2.7 zirabirire omulimu gw’eddwaliro lya International specialized hospital, Lubowa.
Ababaka abatuula ku kakiiko nga bakuliddwamu omubaka omukyala owa disitulikiti ye Mubende, Hope Grania Nakazibwe kino akigaanye nabuuza bano balage ssente zino kyezigenda okukola ate nga tewali mulimu gukolebwa ku ddwaliro lino.
Kino kiwagiddwa Ssentebe w’ akakiiko kano, Charles Ayume neyeewunya lwaki Minisitule tewanduukulula Puloojekiti ye Lubowa mu bitabo byaayo kuba ku kifo kyennyini tewali kitambula.
Wabula Kamisona w’ebyenzimba mu Minisitule y’ebyobulamu, George Otim ategeezezza ababaka nti wadde eddwaliro lye Lubowa likandaaliridde, omulimu gw’okuzimba gugenda kuddamu mubwangu kuba bafunye Kontulakita omulala.