Bya Musasi Waffe
![](https://gambuuze.ug/wp-content/uploads/2020/08/Museveni-11.jpg)
ENTEBBE
Pulezidenti Yoweri Kaguta Museveni , asabye abantu abakyali abaavu okwesonyiwa eby’obukulembeze kuba omuntu yenna eyeegwanyiza ekifo kyonna alina okubaako n’enkulakulana gyatuuseko mu nga omuntu.
“Nze sagala bakulembeze baavu, ogenda kulembera ki? Bwobeera omukulembeze olina okubaako eddoboozi ly’abantu ly’otuusa; omusuubuzi asobola okwogerera abasuubuzi, omulimi nayogerera abalimi kuba ategeera eby’okulima. Bwoba tolina kyomanyi nga ogamba oli mukulembeze, obeera okulembera ki?” Museveni bweyabuuzizza.
Bino Museveni yabyogeredde mukukuza olunaku lw’abavubuka mu nsi yonna wali mu maka g’obwapulezidenti Entebbe ku Lwokusatu lwa wiiiki eno.
Ono yasabye bulijjo abakulembeze okubeera eky’okulabirako kyabo bebakulembera.
“Okulembera kiri ku kuyamba bantu kweyimirizzaawo. Bujjulizi ki bwolina abalala kwebasobola okuyigira, olina kutandika nakuyamba bantu bakwetoolodde nga otandika n’amakaago.” Museveni bweyalambuludde.
Bweyabadde ayogerako eri abavubuka minsita w’ekikula ky’abantu Frank
Tumwebaze, yagambye nti bakoze nnyo nga minisitule okukyusa obulamu
bw’abavubuka n’okubakulakulanya nga babateerawo pulogulaamu nga ‘Youth Livelihood Fund’ eyambye okubafunira entandikwa.
Tumwebaze yanyonyodde nti, olwaleero welutuukidde nga bakayamba ebibiina by’abavubuka ebiwera 20361 nga bano bawereddwa ssente eziwera obuwumbi 162 , ku zino abavubuka abasooka okuzifuna bamaze dda okuzzaayo obuwumbi 37 .
“Buno bujjulizi nti enteekateeka eno eyambye eriko beeyambye, singa abavubuka bano babadde tebakola magoba tebandisobodde kuzzaayo ssente zino.” Tumwebaze bweyagasseeko.