Bya Ssemakula John
Bulange -Mmengo
Minisita wa gavumenti ez’ebitundu mu Buganda, Owek. Christopher Bwanika asabye Abaami ku mitendera egy’enjawulo okweyuna tekinologiya n’omutimbagano basobole okutuusa ku bantu ba Kabaka empeereza eggwanidde.
Obubaka buno, Ssaabawolereza Bwanika abadde atikkula Bannakyaggwe naba Ssese Oluwalo olusobye mu bukadde 14 mu Bulange e Mmengo ku Lwokubiri.
Owek. Christopher Bwanika Abaami abakuutidde bulijjo okweyuna omutimbagano n’emikutu emigatta bantu kuba gisobola bulungi okubayambako okuggusa obuvunaanyizibwa bwabwe mu budde.
Bwanika abasabye okunyweza obumu nga luno lwelutindo olwokubayunga ku nkulaakulana ate nokuzza Buganda ku ntikko.
Ye omumyuka owokubiri owa Ssekiboobo Rashid Kanakulya Luswata akubiriza abantu ba ssaabasajja okwongera okwetaba mu nteekateeka z’Obwakabaka nga mu kino Buganda lwejja okugenda mu maaso.
Abaami be gombolola baloopye embuga ebimu ku bibasoomoza kyoka bano bategezezza nti tebaganya kusoomoza kuno kubajja kumulamwa batema empenda okulaba nga bakuvuunuka.
Eggombolola okuli Ssaabaddu Ntenjeru,Mutuba 1 Nakisunga ne Mutuba 7 Kawolo zezikiise okuva e Kyaggwe nga ate Musaale Bubeke ne Ssaabagabo Kyamuswa zezivudde mu ssaza lye Ssesse.