Bya Ssemakula John
Buweekula
Abaami ba Kabaka okuva mu masaza ga Buganda 18, bakkaanyizza wamu okukuyega abantu ba Kabaka balwanirire enkola y’ettaka lya Mayiro, gavumenti ly’egamba nti eyagala okuliggyawo nga bagamba nti kino tebagenda kukikkiriza.
Bano mu lukung’aana lwabwe olutudde ku kitebe ky’essaza Buweekula, era baliko ensonga ez’enjawulo ze bateesezzaako okulaba nga bakuumira Buganda ku ntikko.
Ssentebe w’olukiiko lw’abaamasaza, Ppookino Jude Muleke agambye nti bakkaanyizza okutandikirawo okulwanyisa entegeka z’okuggyawo mayiro nga bagenda kutandikira waggulu ku masaza olwo bagitwala wansi ku magombolola okutuuka wansi mu byalo.
Abaami bano era bakkaanyizza okutambuzanga enkiiko zino mu masaza ag’enjawulo kibasobozese okutegeera ebizibu by’amasaza ag’enjawulo, basobole okubisalira amagezi nga bali wamu kitole olwo Buganda esobole okuyitimuka.
Ate omubaka wa Buweekula mu Palamenti, Mbabazi Pascal bwe yabadde ayogerera mu lukiiko luno, abaami yabasabye okulwanyisa ekibbattaka ekiri mu Buweekula kuba kino kizing’amizza ekitundu kyabwe awamu n’okulemesa enteekateeka z’Obwakabaka ez’okwekulaakulanya nga Emmwanyi Terimba nga batya nti ssaawa yonna ebintu byabwe bijja kusaayibwa.
Omwami w’essaza ly’e Buweekula, Nantayi Margaret Kafeero yategeezezza nti olutuula luno lutudde mu kaseera akatuufu kuba wabaddewo abatambuza eng’ambo nga Buweekula bwe litali ssaza lya Buganda nga kino kimazeewo eng’ambo zino.