Bya Ssemakula John
Kamwokya – Kyaddondo
Bannakibiina ki National Unity Party (NUP) balabudde nga bwebagenda okwekalakaasa olw’abebyokwerinda okugenda mu maaso n’okuwamba abawagizi babwe nga kati baweze 137 abagambibwa okutwalibwa bamukwatamundu.
Bano era balaze ab’enganda abalumiriza ab’ebyokwerinda okuwamba abantu babwe nga balaajana nti embeera mwebali nzibu kuba abantu babwe abawambiddwa ab’ebyokwerinda bebabadde babalabirira.
Abakulembeze mu kibiina kino nga bakuliddwa Robert Kyagulanyi Ssentamu ategeezezza bannamawulire e Kamawokya nti abawagizi babwe abawera 137 bebatamanyiddwako mayitire.
“Pulezidenti yakakasa nti bebalina abantu baffe, Minisita w’ensonga ez’omunda naye nategeeza Palamenti nti balina abawagizi baffe bebakwata naye ekyo kyetwasemba okuwulira, twagala bakomyewo abantu baffe,” Kyagulanyi bw’agambye.
Kyagulanyi asabye abo bonna abakwatirwa abantu babwe okwekalakaasa mu mirembe bababanje kuba tebalina musango.
Ono era alaajanidde amawanga g’ebweru okuvaayo bataase embeera kuba ekiri mu ggwanga kati kisinga ekyaliwo ku mirembe gya Idi Amin kuba obukulembeze bwa Pulezidenti Museveni buyitiridde okulinyirira eddembe ly’obuntu.
Oluvannyuma lw’okuwambibwa kw’ abawagizi be okuddamu, Kyagulanyi yazeemu buto okubanja abawagizi be nga ayita ku mutimbagano.
Kinajjukirwa nti okusooka ekibiina kyafulumya olukalala lwa bantu 243 mu mwaka gwa 2021 abaali bawambiddwa wabula ekibiina kyategeeza nti abaali bawambibwa baali basoba mu 458 era nebateekawo ekitabo ku kitebe kyabwe ab’enganda mwebaali bawandiika ebikwata ku bantu babwe nelwebasemba okubalaba.
Ku nsonga y’ekiwambabantu okuddamu, minisita w’ensonga z’amawulire Chris Baryomunsi wiiki ewedde yasabye aba NUP okutegeeza poliisi n’ebitongole by’ ebyokwerinda bwekiba nga kituufu nga abantu babwe babuzibwawo.