Bya Francis Ndugwa ne Gerald Mulindwa
Masaka- Buddu
Abayizi ba ssettendekero wa Muteesa I Royal abasoba mu 600 batikkiddwa ddiguli ne dipulooma mu masomo ag’enjawulo.
Omukolo guno gukoleddwa mu ngeri ya Ssaayaansi era nga gwetabiddwako Katikkiro Charles Peter Mayiga, Omumyuka owookubiri owa Katikkiro Owek. Prof. Twaha Kigongo Kaawaase, Minisita Nankindu Kavuma awamu n’abalala nga guyindidde ku kitebe e Kirumba Masaka mu Buddu.
Bw’abadde atikkira abayizi bano, Cansala wa ssettendekero ono era omulamuzi w’ensi yonna, Julia Ssebutinde ayozaayozezza abayizi abasobodde okumalako emisono wakati w’ekirwadde kya Ssennyiga Corona.
Omulamuzi Ssebutinde asiimye Ssaabasajja Kabaka olw’okutandikawo ssettendekero ono asobodde okutendeka abayizi ku bisale ebya wansi ddala. Yeeyamye okwongera ku mutindo gw’ensoma y’abayizi nga bettanira enkola ya tekinologiya.
Ono yeebazizza olukiiko olukulembera ssettendekero olw’okuwuliriza ne bateeka essira ku kuyigiriza ebyobulimi, okusobola okulwanyisa ebbula ly’emirimu mu ggwanga.
Omulamuzi Ssebutinde era abasiimye olw’okubangawo enkolagana n’amatendekero mu mawanga amalala ekyongedde okutumbula okuvumbula n’obuyiiya n’okugabirira ssettendekero ono.
Asuubizza nga bwe bagenda okuweebwa ‘Charter’ okuva mu kakiiko akalung’amya ebyenjigiriza mu ggwanga mu bwangu.
Bw’abadde ayogerako eri abayizi bano, Katikkiro Charles Peter Mayiga, ategeezezza abayizi nti kye baweebwa mu kutendekebwa kwe kulaba ebintu mu ngeri ey’enjawulo wamu n’okuyiiya amagezi agasobola okwang’anga ebizibu ebisoomooza abantu.
Owek. Mayiga abasabye okwerwanako naddala mu kiseera kino nga bayingira ensi ejjudde abantu, boolese emiramwa egy’enkizo gye bafunye mu ssettendekero ono nga bafuba okubeera abatetenkanya nga beeyambisa omutimbagano.
Abalambise okukola n’amaanyi era bakulembeze obwetowaze era bakomye okukulembeza ebyo bye basoma naye batunuulire ensi era beerowooleze ku ebyo bye basobola okugikolera.
Ate ye minisita avunaanyizibwa ku by’enjigiriza mu Buganda, Owek. Dr. Prosperous Nankindu, abayizi abatikkiddwa abasabye okweyisa obulungi era ebitabo n’obuyivu bwabwe bulabikire mu bye bakola so si kubyogerera.
Amatikkira gano geetabiddwako abantu ab’enjawulo omuli; baminisita, abakungu n’abaweereza mu Bwakabaka era ng’abamu omukolo bagwetabyeko nga basinziira ku mikutu gy’Obwakabaka egy’amawulire.