Bya Ssemakula John
Bulange – Mmengo
Aba kampuni ya Master links Group bakyaddeko e Bulange Mmengo nebasisinkana Omumyuka Asooka owa Katikkiro era Minisita w’obuyiiya n’enzirukanya y’emirimu, Owek. Prof. Twaha Kigongo Kaawaase nebalaga obwetaavu okukolagana ne Buganda.
Owek. Kaawaase annyonnyodde nti bano bajjidde mu kiseera kituufu wakati nga Obwakabaka bwagala okutumbula eby’obulamu nga buzimba amalwaliro mu masaza gonna 18 agakola Obwakabaka .
“Bano bajjidde mu kaseera nga Kamalabyonna yatongoza okuzimba amalwaliro g’Obwakabaka byeboogerako biba byamugaso okutuyunga ku bamusigansimbi, nebatuyunga ku bantu abatuyamba okuddukanya amalwaliro nebatuyunga ku bantu abalina ebikozesebwa,” Owek. Kaawaase bw’ategeezezza.
Owek. Kaawaase yeebazizza Rev. Kajumba olw’okuyunga kampuni eno ku Buganda ku bano okusobola okubaako kyebagatta ku nkulaakulana y’abantu ba Beene.
Okusinziira ku Owek. Kaawaase, abakulu bano bakukwataganyizibwa ne minisita w’ebyobulamu Dr. Prosperous Nankindu Kavuma awamu naba BICUL okusobola okwekeneenya engeri ez’enjawulo gyebasobola okukwataganamu ne Buganda.
Akulira kampuni ya Masterlinks , Mike Watkins yeebazizza Obwakabaka bwa Buganda olw’okufaayo eri abantu n’okutumbula eby’obulamu nga babasomesa ebikwata ku ndwadde ez’enjawulo
Ye Omulangira Derrick Mawanda nga yakulira eby’obusuubuzi mu Melo Health Services agamba nti guno omukisa munene okukwatagana ne Buganda okusobola okukyuusa embeera z’abantu.