Bya Betty Namawanda
Buddu – Masaka
Ebula ennaku mbale empaka z’ekikopo z’amasaza ga Buganda zikomekerezebwe mu kisaawe kya St. Mary’s Kitende ng’essaza Buddu ne Gomba be batuuka kufayinolo.
![](https://gambuuze.ug/wp-content/uploads/2021/03/12ce92d0-3d88-4618-becb-b924706f3d45.jpg)
Bannabuddu bangi beesunga buwanguzi era nga bongedde ebbugumu mu kuvujjirira ttiimu yaabwe mu nnaku zino ezisembayo, esobole okuwangula ttiimu ya Gomba.
Ekibiina ky’obwegassi ekya Masaka Union ekirima endokwa z’emiti ez’ebika ebyenjawulo ate n’okutunda eddagala ly’ebirime ery’omutindo ssaako okuwola ssente n’okugula emmwanyi, kivuddeyo ne kikwasa Ppookino Jude Muleke ensimbi emitwalo 50 ne bbokisi z’amazzi 20 okudduukirira ttiimu y’essaza mu nkambi.
Aba Masaka Union obuyambi buno babututte ku mbuga y’essaza Buddu nga babukwasizza Omwami wa Kabaka atwala essaza Buddu, Ppookino Jude Muleke awamu n’olukiiko era ng’aba Masaka Union baakulembeddwamu Hillary Kasozi.
Mu kwogera kwe, Hillary Kasozi ategeezezza nti nga bannabuddu era abakolera emirimu gyabwe mu ssaza lino, kibakwatako nnyo n’asaba Ppookino okukola ekisoboka okuwangula Gomba.
Ppookino Jude Muleke asinzidde wano ne yeebaza aba Masaka Union okuvaayo ne bakwatizaako okusobola okulaba nga ttiimu yaabwe tejula n’abasaba beeteeketeeke okutandika okussa ssente mu ttiimu eno nga be bavujjirizi abakulu.
Ono era akunze bannabuddu kuwagira aba Masaka Union olw’okuba baagala nnyo ebintu by’Obwakabaka era n’akakana bannabuddu nti bagenda kuleeta obuwanguzi.