Bya Musasi Waffe
Kampala
Omugagga w’omu Kampala era nnanyini kkampuni ya CTM etuusa ttayiro (Tiles) mu ggwanga, Joseph Magezi, asangiddwa enkya ya leero ku Lwokubiri nga yafiira mu kisenge kye ku bizimbe bya Bugoloobi Flats kw’abadde asula.
Omulambo gwa Magezi gusangiddwa nga gutandise okuvunda ekiraga nti alaga yafa mu zimu ku nnaku eziyiseewo era guzuuliddwa ku Bulooka 21 ku Bugoloobi Flats.
Okusinziira ku batuuze, Joseph Magezi babadde bamaze ennaku nga tebamulaba naye enkya ya leero owa boodabooda atera okumuvuga azze amunoonya bwe batuuse w’abeera nga mu nnyumba mufubutukamu ekivundu ekyamaanyi. Bano bayise poliisi nayo etuuse n’etwala omulambo wadde egaanye okubaako ky’eyogera ku biyinza okuba nga byaviriddeko omuntu ono okufa.
Bo abatuuze balumiriza okufa kwa Joseph Magezi nti kwekuusa ku musango gw’abadde nagwo mu kkooti ne muganda we, Gregory Magezi nga bakaayinira obwannannyini bwa kkampuni eno, esangibwa e Nsambya.
Omusango guno ogumaze akaseera kkooti ejulirwamu yagusala mu Gwokubiri gw’omwaka guno era Joseph Magezi ne gumusinga.
Mu musango guno, Joseph abadde alumiriza muganda we, Gregory Magezi okwekobaana ne kkampuni ya South Africa Italtile Ceramics Group n’amuwaliriza akkaanye nabo ku kkooti enkulu era CTM esasule akakadde ka ddoola 1.65.
Mukukkaanya kwe baakola ku kkooti enkulu, CTM yakkiriza okusasula ssente zino era bwe zinaalema aba Italtile baakutwala kkampuni eno n’ebyobugagga byayo ebiri ku luguudo Plot 26-28 ebisangibwa e Nsambya.
Kino kyaddirira kkampuni zino zombi okwegatta mu 2008 mu mukago gwa Ulmuss Properties Uganda era kkampuni ya CTM yali yeetaaga ssente okusobola okugula emigabo mu Ulmuss.
Oluvannyuma ssente, CTM zaagiremerera okuzzaayo ezaali zituuse mu kakadde ka ddoola n’emitwalo 20 era bwetyo Italtile n’egenda mu kkooti ng’esaba esasulwe obukadde bwa ddoola 2.
Mu mwaka gwa 2015, bano ensonga baazimalira wabweru wa kkooti era ebyakkaanyizibwako omulamuzi David Wangutusi n’abijulira era wano CTM yalina okusasula aba Italitile akakadde ka ddoola kalamba n’emitwalo 60 era mu kukkaanya kuno CTM yakikirirwa Gregory Magezi omu ku batandisi baayo.
Wabula oluvannyuma Joseph Magezi yeekubira enduulu mu kkooti ejulirwamu ng’agamba nti Gregory teyamwebuuzaako ku byonna ebyasalibwawo kye yagamba nti mwalimu ekkobaane.
Wabula kkooti eno yakkaanya n’ebyali bisaliddwawo Omulamuzi Wangutusi nti kuba Gregory Magezi yali talinamu migabo kyokka naye ye yali Ssenkulu wa kkampuni eno.
We tukoledde eggulire lino kibadde tekinnamanyika oba ebyobugagga bya CTM, Italtile yabyeddiza.