Bya Ssemakula John
Kampala
Poliisi mu Kampala ekutte abantu abasoba mu 50 , bano basangiddwa nga bakungaanidde mu nnyumba emu nga banywa omwenge ekintu ekikontana n’ebiragiro bya Minisitule y’ebyobulamu ku kirwadde ki COVID19.
Okusinziira ku mwogezi wa poliisi mu Kampala n’emirilaano Luke Owoyesigire, ekikwekweto kino bakikoze ku Ssande ku ssaawa ssatu ez’ekiro.
Owoyesigire yagambye nti, batemezeddwako ogumu ku mikutu gy’amawulire oluvanyuma lw’ abatuuze okwemulugunya ku bantu abawerako abakungaanira munnyumba emu ku kyalo Balintuma nebeekatankira omwenge n’okuleekanya ebidongo.
Ebikolwa bya bano bibadde bimazeeko abantu mu kitundu kino emirembe era nga bisobola okuvaako ekirwadde ki COVID19.
Abakwate bakuumirwa ku Poliisi ya Kira Road era nga bagenda kubavunaana okujeemera amateeka wamu n’okwetaba mu bikolwa ebiyinza okusaasaanya ekirwadde ki COVID19.
Poliisi era yazinzeeko ebbaala ya Nomads e Bunga nekwata abantu 49 abasangiddwa nga bali mu kunywa .
Owoyesigire yategeezezza nti bano okuli nnanyini bbaala ya Nomads Fred Kamau ne bamaneja 8 bakuumirwa ku poliisi ye Kabalagala .
Bino webigidde nga omuwendo gw’abantu abakwatibwa ekirwadde kino gweyongera buli kadde, abakugu kyebagamba nti kivudde ku butafaayo ku mateeka ga COVID19.