![](https://gambuuze.ug/wp-content/uploads/2019/12/Bundibugyo-2.jpg)
Musasi waffe
Abantu 20 bakakasiddwa okufiira mu mataba agaazinzeeko disitulikiti ya Bundibugyo mu bugwa njuba bwa Uganda. Kaweefube nga akulembeddwamu abadduukirira ebibamba aba Uganda Red Cross akyagenda mumaaso okuzuula emirambo emirala egirowoozebwa okuba nga gyatwaliddwa amazzi. Red Cross era akyadduukirira abo abaawonye ng’ebayamba okufuna webagira nga beegeka emba. Ayogerera Red Cross mu ggwanga Irene Nakasiita yategeezezza nti bakaawonawo kati batwaliddwa mu masomero n’amasinzizo okugira nga babeera eyo. Nakasiita yategeezezza nti nga bakolaganira wamu ne woofiisi ya Ssabaminista ekola ku bigwa bitalaze, bali mukaweefube wakufunira bakaawonawo bano emmere, eddaggala, wamu n’ebikozesebwa mubulamu obwabulijjo ebirala.
![](https://gambuuze.ug/wp-content/uploads/2019/12/Bundibugyo.jpg)
Ebitundu ebyasinze okukosebwa mulimu Busaru, Harugale, Ngite, Bubukwanga Ntotoro, Tokwe, Kisuuba, Bukonzo, Sindira, n’ebirala. Enkuba ettonya tesalako mubitundu by’eggwanga eby’enjawulo kati kumpi emyezi nga etaano erese Bannayuganda bangi naddala mu bitundu ebiriranye ensozi nga Masaba mu Bugisu nga bafumbya miyagi. Mu bitundu by’e Bududa, Sironko, Bulambuli n’ebirala ettaka lyabumbulukuka neritta abawerako wiiki ewedde. Uganda siyeeyokka ekoseddwa enkuba eno, embeera y’emu mu Kenya, ne Somalia nga nayo abantu bangi baluguzeemu obulamu.