Bya Musasi Waffe
Nebbi
Eyeesimbyewo ku bwapulezidenti ku kkaadi ya FDC, Patrick Amuriat, ayimirizza z’okunoonya akalulu oluvannyuma lw’emmotoka ye ebaddeko ebidongo, okugwa ku kabenje n’etta abantu babiri ate abalala ne bagendera ku bisago mu bitundu by’e Pakwach.
![](https://gambuuze.ug/wp-content/uploads/2020/11/amuriat.jpg)
“Kano akaseera kazibu gye tuli era olw’ensonga eyo tusazeewo okuyimiriza mu kunoonya akalulu.” Amuriat bw’ategeezezza.
Akabenje kano kagudde ku kyalo Kimor, mu ttawuni kkanso y’e Panyamur mu disitulikiti y’e Pakwach oluvannyuma lw’emmotoka nnamba UBB 856W okulemerera omugoba waayo ne yeefuula.
Amuriat yasookedde Nebbi ku makya ga leero Olwokubiri nga mu ttuntu abadde alina okubeera mu disitulikiti y’e Nebbi gy’anava ayolekere ebitundu bya Bunyoro ku Lwokusatu.
Abafunye ebisago batwalibwa mu ddwaliro lya Panyamur Health Centre ne Angal Hospital erisangibwa e Nebbi.
Bw’abadde e Nebbi, Amuriat ajjukizza abantu nti olutalo lw’okununula Uganda lunaatera okuggwa era ng’abalwanyi balina okugumira obulumi obusinga ku ebyo gavumenti ya Pulezidenti Museveni bye bayisizzaamu.
Abafudde bategerekese nga Hellen abadde akwatidde FDC bbendera ku bwakkansala bw’ekibuga kya Nebbi wamu ne Kkansala aliko Zulaika era ng’ono abadde omu ku bakunzi b’ekibiina mu kitundu kino.
Abafunye ebisago kuliko; akulira abavubuka ba FDC e Nebbi; Walter, Grace Owonda n’abalala.