Bya URN
Eggye lye ggwanga li Uganda People’s Defence Forces (UPDF) liwakanyiza ebyogerwa ku mutimbagano n’emikutu gy’Amawulire nga bwebasse Abakaramoja abawera 400 mu disitulikiti ye Moroto mu bikwekweto by’omubanga byebakoze okulwanyisa ababbi b’ente.
Ku ntandikwa ya wiiki eno, emikutu gy’amawulire mukitundu kino gyasimbuliza ebigambo bya Ssentebe w’ekibiina ki Karamoja Youth Agenda Vision 2040, Emmanuel Chero, nga akakasa ng’ennumba za UPDF ez’omubanga ezakoleddwa e Nakabaat ne Lotisan bwezafiriddemu abantu abawera 400.
Chero yategeezezza nti ababbi b’ente bwebatta abakugu mu by’embeera y’obudde n’abajaasi, amagye gatandika okubayigga naye kati obusungu babutadde ku batuuze nga kati babasuddeko bbomu ku byalo n’ennyumba zabwe nebattiramu abantu abatalina musango.
Mu ngeri yeemu, eyavuganyako ku bwapulezidenti, Joseph Kabuleta naye yalumiriza UPDF okutirimbula abantu mukitundu kino yeekwese mu kufuuza ababbi b’ente.
Wabula omwogezi w’ekibinja kya UPDF eky’okusatu mu ggye ly’okuttaka, Isaac Oware agamba nti buno bulimba nasaba abantu obutabugenderako.
“Waliwo ebitambuzibwa mu mikutu gy’amawulire egy’enjawulo nga biraga nga bwewaliwo ekittabantu mu kimugunyu mu Karamoja. Bino si bituufu era temulina kubigenderako,” Oware bwe yagambye
Oware yannyonnyodde nti bukya baddamu kukola bikwekweto bino mu July 2021, okuggyako abakambwe ababba ente emmundu, ku bano 385 be battiddwa. Ono agamba nti mu bikwekweto bino bagobererera amateeka agafuga okulwanagana era balwana nnyo okukuuma n’okutaasa obulamu era omujaasi ajeemera amateeka gano abonerezebwa.
Ono alabudde Chero okukomya okusiga obukyayi mu bantu nasaba abakulembeze bonna okulwanirira emirembe okubukala mukitundu kino mu kifo ky’okutematema mu bantu b’e Karamoja.
Omwogezi w’eggye lya UPDF, Brig Gen Felix Kulayige yakakasizza nti kituufu ennumba z’omubanga zakoleddwa naye bwewabaawo abalugendeddemu omuwendo ogwogerwa gwongeddwamu nnyo.
Ssentebe w’Abavubuka mu ggombolola ye Rupa, ye agamba nti amagye gasudde bbomu ku mbalama z’omugga Nakabaat naye tewali muntu wa bulijjo yalumiziddwa kuba babadde bagaaniddwa okugenda mu bifo olutalo gyeluyindira.