Bya Francis Ndugwa
Bulange – Mmengo
Minisita w’eby’obuwangwa, ennono, obulambuzi, embiri, olulimi n’ebyokwerinda mu Buganda, Owek. David Kyewalabye Male asabye gavumenti okusengula basajja baayo abasimba amakanda ku mbuga ya Kaggo e Kasangati kuba bazibuwazizza emirimu ku mbuga eno.
Okusaba kuno Owek. Male akukoledde mu bimuli bya Bulange bw’abadde atikkula oluwalo lwa bukadde obusobye mu 70 okuva mu masaza okuli Kyadondo , Butambala ne Bugerere ku mbuga enkulu e Bulange e Mmengo bw’abadde atikkula oluwalo ku lwa Katikkiro Charles Peter Mayiga ku Lwokubiri.
“Bweba gavumenti yakomyawo ebintu byaffe ereme kutuleetera kukangula ku ddoboozi okubituddiza n’olwekyo nsaba gavumenti ejjulure abaami abali ku mbuga ya kaggo, embuga eno esobole okwegazaanya. Kaggo tasobola kuyita mu misanvu okutuuka wajja obuvunaanyizibwa bwe. Sserwajja okwota tasobola kukiza nnyinimu ntanama,” Owek. Kyewalabye bw’agambye.
Kino kiddiridde abamajje abeesenza ku mbuga eno okugaana Kaggo okugiyingiramu Sabiiti ewedde bweyali agenda okusisinkana abakulembeze abalondebwa mu kitundu ekyo awatali kumuwa nsonga yasimba.
Okusinziira ku Minisita Kyewalabye bwotunuulira ekizimbe Bulange olabira ddala ensonga lwaki Buganda esaana okwekolera ku nsonga zaayo.
Owek. Male asabye abantu mu Buganda okunyweza enkola za Bulungibwansi okusobola okukuuma abantu ba Kabaka nga balamu, era bakole ebyooto buli kiseera ekigere okusobola okulambika abantu ba Nnyinimu obulungi.
Ono abasabye okunyweza olulimi lwabwe kuba singa lusaanawo ne Buganda ejja kusaanawo kuba emiti emito gikuziddwa mu mpisa eng’enyi kuba okunnoonyereza kulaze nti abaana abato basobola bulungi okukwata ennimi eziwerako.
Owek. Kyewalabye yeebazizza abaami ba Kabaka olw’okukuumira abantu ba Kabaka awamu era nebasobola okulaba obukulu bw’okuvugirira Nnamunswa naddala mu kiseera kino nga Buganda tesolooza musolo.
Ate Minisita Omubeezi owa Gavumenti ez’Ebitundu Owek. Joseph Kawuki awadde abaami ba kabaka nabakulembeze mu bwakabaka ku mitendera egy’ enjawulo okubeera abamalirivu okusobola okutuukiriza obuvunaanyizibwa bwabwe.
Omwami atwala essaza lye Kyaddondo, Kaggo Agnes Nakibirige Ssempa ku lwabaami bamasaza yeebaziza abantu ba kabaka abafaayo okutuukiriza obuwangwa bwabwe nga beetaba mu nteekateeka ezitumbula Buganda
Abaami b’Eggombolola beebaziza kabaka olw’ enteekateeka zasaawo okutumbula embeera zabantu era nebawera okuweereza awatali kutiirira Mpologoma.
Mungeri yeemu bano bakiise embuga baleese amakula awamu namantambuntambu Katikkiro .