Bya Ssemakula John
Wakiso
Wabaddewo kalumanywera wakati wa poliisi n’abawagizi b’omubaka wa Munisipaali y’e Kira, Ibrahim Ssemujju Nganda, oluvannyuma lwa poliisi okugezaako okubalemesa okutuuka ku woofiisi z’ebyokulonda.
Ssemujju eyagaanye okugondera ekiragiro ky’akakiiko k’ebyokulonda ekiwera enkung’aana n’okutambulira mu luseregende lw’emmotoka, asoose kukwatibwa poliisi okugezaako okulemesa abantu ababadde bamuwerekera.
Abawagizi ba Ssemujju ababadde bayambadde engoye ezimuwaana wamu n’okuyimba ennyimba ezitendereza ekibiina kya Forum for Democratic Change, bakedde mu maka ge era bwe batandise okutambula okugenda e Wakiso basannyalazza ebyentambula era poliisi n’ebakubamu ttiyaggaasi okubagumbulula.
Omubaka Ssemujju akukkulumidde Poliisi n’ategeeza nti ebiragiro bya COVID-19 babiteekamu okusosola nga bwekituuka ku ba NRM bakola bye baagala, ate abavuganya nebakugirwa.
“Museveni twamugamba nti tuleme kubeera nakulonda mu biseera bya COVID-19 n’alemerako, kati babadde baagala nzije ng’agenda ku lumbe, ndekeyo abantu ate be ngenda okukiikirira,” Ssemujju bw’annyonnyodde.
Ssemujju eyawerekeddwa poliisi okusunsulwamu era n’emulinda okumuzzaayo, asabye poliisi okuyimbula abawagizi be abasibiddwa ku Poliisi y’e Kira, Kasangati ne Wakiso kubanga tebalina musango gwe bakoze.
Abapoliisi ababadde mu kikwekweto kino bagaanye okubaako kye boogera ku nsonga eno.
Bannabyabufuzi abaagala okukiika mu Palamenti ye 11 bakyagenda mu maaso n’okwendiisa era nga luno lwe lukalala lw’abamu ku bamaze edda okusunsulwamu akakiiko k’ebyokulonda.