Bya Ssemakula John
Kampala
Abakulira bbanka ya Stanbic bakakasizza nga omu ku bakozi baabwe bwakwatiddwa ekirwadde ki COVID-19.
Ono mukozi ku ttabi lya William Street mu Kampala era nga mu kiseera abakugu bali mukumujjanjaba.
Bbanka eno yafumizzaawo ekiwandiiko ku Lwokubiri ekinyonyonyola embeera eno ne kaweefube gweliko okutangira ekirwadde kino okusaasaaana.
“Abakozi bonna ababaddeko naye ku ttabi lya William, bakebeddwa era nebalagirwa okweyawula mu kalantiini okumala ennaku 14 mu maka gabwe, kiyambe okuzuula abafunye ekirwadde kino,” Ekiwandiiko bwekyasomye.
Kigattako nga ettabi lino bwelijja okuggulwawo nga abakugu bamaze okukyekebejja, okuyonja n’okufuuyira ekifo kino eddagala eritta akawuka n’okunyweza enkola ezitangira ekirwadde kino.
Ekiwandiiko kisabye bakasitoma okweyambisa empereza za bbanka eno ez’omutimbagano.
Aba bbanka eno banyonyodde nti bakolera wamu ne Minisitule y’ebyobulamu okulaba nga omukozi wabwe ono afuna obujjanjabi obulungi asobole okusuuka amangu.
Bbanka ya Stanbic yeegasse ku lukalala lwa kkampuni ez’obwannanyini n’ebitongole bya gavumenti ebisangiddwa n’abakozi abalina ekirwadde kino nga ababadde bakasembayo be ba Minisitule y’ebyensimbi aba gavumenti eya wakati.