Bya Ssemakula John
Kampala
Akulira akakiiko k’ebyettaka mu ggwanga, Beatrice Nyakaisiki Byenkya asimbiddwa mu kkooti ewozesa abakenuzi ku Lwokubiri n’avunaanibwa omusango gw’okukozesa obubi woofiisi ye.
Byenkya avunaaniddwa wamu n’abakuumi be basatu okul; Richard Godfrey Anywar, Titus Wamono ne Edward Turyatunga nga kigambibwa nti ye ne banne baalemesa abakungu ba Kaliisoliiso wa gavumenti okwekebejja woofiisi ye nga bwe baali baalagirwa mu mateeka.
“Omuvunaanwa we yabeerera Ssentebe wa Uganda Land Commission n’abakuumi be bwe baali mu Kampala ng’ennaku z’omwezi January 4, 2022 yakozesa bubi woofiisi ye n’aziyiza okugikebera mu bugenderevu, ekikontana n’amateeka agafuga woofiisi eno, gavumenti awamu n’ekitongole kya Kaliisoliiso.” Empaaba bw’esomye.
Wabula bano emisango bagyegaanye era wano oludda oluwaabi nga lukuliddwa Dr. Earnest Katwesigye ne Thomas Okoth bategeezezza kkooti ng’okunnoonyereza mu musango guno bwe kukyagenda mu maaso.
Era abavunaanibwa bano bonna basabye kkooti okweyimirirwa era we tukoledde eggulire lino ng’Omulamuzi Joan Aciro akyawuliriza okusaba kwa bano.