Bya Samuel Stuart Jjingo
Bushenyi
Ssentebe wa Nkobazambogo mu ggwanga Adrian Lubyayi alabudde abavubuka okwerinda akawuka ka Mukenenya akeeyongera buli lukya bwebaba baagala okubeera n’ebiseera by’omu maaso ebitangaavu.
Entanda eno, Mw. Lubyayi agiweeredde Ishaka ne Bushenyi mu nteekateeka gyaliko okulambula bannakibiina kino wonna mu ggwanga okwongera okubalambika.
Mw. Lubyayi ategeezezza nti buli lukya akawuka kongera okusensera era ebibalo biraga nti keegirisizza nnyo mu bavubuka bwatyo naabasaba okubeera ku bwerinde kubanga Buganda ebeetaaga balamu bulungi basobole okugigasa.
Bano abasabye okwetaba butereevu mu lutalo lw’okuzza Buganda ku ntikko nga bawagira enteekateeka Beene zaleeta okutumbula embeera z’abantu naddala abavubuka.
Lubyayi abakuutidde okunyweza emisomo gyabwe era babeere obumu nga Ssaabassajja bwabakubiriza
Ono yeekokkodde ku byensula mu bitundu bino byagambye nti si birungi bwatyo naasaba wabeewo ekikolebwa ku nsonga eno.
Mu nteekateeka eno, Ssentebe Lubyayi alambudde ebitundu okuli; Ishaka Bushenyi Kabaale ne Mbarara era asuubirwa okutuukako mu bitundu bye Gulu mu mambuka.