Bya Francis Ndugwa
Bulange – Mmengo
Ssaabasajja Kabaka Ronald Muwenda Mutebi II asiimye n’agulira Olukiiko lw’Abataka Abakulu b’Obusolya emmotoka kapyaka ekika kya Drone ebayambeko mu kutambuza emirimu gyabwe.
Emmotoka eno ebakwasiddwa Katikkiro Charles Peter Mayiga era agikwasizza Omukubiriza w’Olukiiko lw’Abataka, Omutaka Namwama Augustine Kizito Mutumba enkya ya leero ku Mmande ng’omukolo gubadde ku mbuga enkulu e Bulange e Mmengo.
“Teri kyenkana kika mu ebyo ebitufuula omuganda, obulamu bw’omuganda byetoloolera ku bika omuli ne kya bannyaffe era bino bye bituyunga ku Kabaka. Ensangi zino tuli mu kaweefube w’okuzza Buganda ku ntikko era kaweefube ono ateekwa okussa ebika ku mwanjo nga tuyita mu nteekateeka eziyitimusa ebika byaffe.” Owek. Mayiga bw’ategeezezza ng’awaayo emmotoka eno.
Owek. Mayiga abasabye abataka okunyweza obumalirivu n’obutetenkanya okusobola okuzza Buganda ku ntikko nga bayita mu kulaakulanya Obutaka obw’enjawulo nga bazimba ennyumba ku butaka, okutumbula ebyobulambuzi, ebyenjigiriza n’obulambuzi.
Kul lwa banne, Omutaka Augustine Mutumba ategeezezza nti ekirabo kino kigenda kubayamba okutambuza emirimu.
Jjajja Namwama Augustine Mutumba yeebazizza Ababaka b’Abataka mu Buganda, Bungereza ne Northern Ireland okubawa Computer ne Printer ze bakozesa mu kiseera kino mu woofiisi yaabwe.
Omukolo guno gwetabiddwako omutaka w’ekika ky’Engabi Nsamba, Omutaka Nakigoye ow’Ekinyomo, Ssaababiito w’e Kibulala, Walugembe, Omutaka Kidimbo ow’Enkelebwe n’Omutaka Muteesaasira ow’Engo.