Bya Ssemakula John
Kasangati – Kyaddondo
Ssaabalangira wa Buganda, Godfrey Musanje, agugumbudde gavumenti olw’okusaagira mu keediimo k’abasomesa b’embeera (Arts) neeremwa nokubawa essuubi mu mbeera nga ebyenfuna by’eggwanga bigootaanye.
Okutabuka Ssaabalangira abadde aggulawo ekibiina kya Nkobazambogo ku ssomero lya Kasangati High School mu ssaza lye Kyadondo ku Lwomukaaga.
“Njagadde okugumya abasomesa nti oluusi abakulembeze tebakola nsobi naye bazibakozesa. Wano kyesikkiriziganya nakyo kwekuba nti abasomesa betuyita aba ‘Arts’ bantu abatendeke obulungi ate nebasosolwa. Tewali musomesa wa sayansi atayiseeko mu mikono gy’abasomesa ba ‘Arts’, gavumenti esaanye okulowooza ku bantu bano,” Ssaabalangira Musanje bw’agambye.
Ssaabalangira Godfrey Musanje asabye abayizi abawereddwa obukulembeze okubutwala ng’ekyomuwendo okubwagasiza bannabwe abalala abali musomero lino.
Ssaabalangira ategeezezza nti Nkobazambogo yafuuka lusuku lwa Kabaka nga mwajja abakulembeze abamuyamba okutuusa enteekateeka ez’enjawulo eri abantu be nasaba abalondeddwa okumanya nti obuvunaanyizibwe bwebafunye bwa nnakyewa naye nga bukulu nnyo.
Omukolo guno gwetabidwako abalangira, bannabyabufuzi, Abaami ba kabaka, abazadde n’abayizi b’amatendekero ag’enjawulo nebasiima essomero lino olw’okuteekawo ekibiina okumanyisa abayizi eby’obuwangwa bwabwe
Abakulembeze ba Nkobazambogo okuva ku ssentendekero wa Kyambogo nga bakulembedwamu Brenda Nakimera bakalaatidde abayizi abaweredwa obuvunanyizibwa okubeera obumu n’okukola obutaweera okutwala ekibiina kino mumaaso
Omulangira Kalindi Simbwa atwala essomero lino nga yegatiddwako akulira ebyenjigiriza mu ssomero lino Peter Kizza basabye abayizi abafunye obukulembeze obutasuula muguluka misomo gyabwe kubanga ly’ ettaala ly’obulamu bwabwe.
Oluvanyuma abayizi abaweredwa obuvunanyizibwa bakubye ebirayiro byabwe ebikakasa obuwereza bwebafunye.