Bya Ssemakula John
Kikuubo – Kyaddondo
Ssaabalangira Godfrey Kikulwe Musanje asabye Gavumenti eya wakati okuwuliriza ensonga abasuubuzi ze bagikaabira entakera naddala ensonga z’okubateerawo embeera ebasobozesa okukola obulungi emirimu mu kibuga Kampala.
Okwogera bino, asinzidde ku Jaguar Hotel mu Kikuubo ku mukolo gw’okutuuza omwami wa Kabaka mu muluka Kikuubo mu ggombolola Kampala Masekati, Omulangira Ggolooba Wilberforce n’omumyuka we Paul Ssekwe ku Lwokuna.
Ssaabalangira ategeezezza nti abasuubuzi bakola kinene okuyimirizaawo gavumenti nga bayita mu musolo naye guno gugwaana okubeeramu obwenkanya.
Ye Omumyuka Ow’okubiri owa Kaggo-Dr. Fiona Nakalinda Kalinda, ono nga y’akoze omukolo gw’okutuuza n’okulayiza abaweereza b’omuluka guno akuutidde Abaami okwewala okwenyigira mu bufere obwa buli ngeri naddala obwekuusa ku ttaka.
Dr. Kalinda abalabudde ku kabi akaboolekedde singa bakwatibwa mu bufere bwonna.
Ate Ssaabagunjuzi w’Ekisaakaate kya Nnaabagereka, Owek. Dr Lukwago Rashid akalattidde Abaami ba Kabaka okwenyumiriza mu kitiibwa ekiri mu buweereza.
Omukolo guno, gwetabiddwako abantu bangi nnyo omuli n’omukulu w’ekika ky’Omutima Omuyanja Jjaja Namugera Kakeeto Nicholus Kasekende awamu n’abalala.