Bya Musasi Waffe
Namirembe
Ssaabalabirizi w’ekkanisa ya Uganda Dr.Steven Kazimba Mugalu, alaajanidde gavumenti eggulewo amasomero abaana basome.
Dr. Kazimba yategeezezza nti, “Tusaba gavumenti erowooze ku ky’okuggula amasomero nga abakulembeze bonna bamaze okuwaayo engeri ezinagobererwa okwewala ekirwadde ki COVID19.”
Okwogera bino Ssaabalabirizi abadde aggalawo omusomo gw’ekibiina ekitaba bannabyanjigiriza mu nzikkiriza ya Kurisito ez’enjawulo wamu ne bannakyewa e Namirembe ku Lwokusatu.
Ono yalaajanidde gavumenti obutongezzaayo kusoma kwa mwaka guno naye bweggulawo ereke okusoma kweyongereyo okutuuka mu mwezi gw’okusatu.
Kazimba era yasabye abaana abali mu bibiina ebikomekerezza emitendera egy’enjawulo basooke baweebwe omukisa okudda ku ssomero.
Bannabyanjigiriza balaze nga bwekisoboka abayizi mu bibiina ebimu okusoma ku mpalo nga kumakya ate abalala nebasoma olw’eggulo okusobola okukendeeza omujjuzo.
Bano bagamba nti, omuggalo gubanyigirizza nnyo era nga abasomesa tebakyasobola kweyimirizzaawo n’amaka gabwe ate nga n’abazadde abaana babazitoweredde.
Kinajjukirwa nti emyezi gigenda kuwera ettaano nga abaana baziddwa eka okwewala okusaasaana kw’ekirwadde ki COVID19 mu ggwanga.