Bya Ssemakula John
Kyambogo
Pulezidenti Yoweri Kaguta Museveni akakasiddwa okuvuganya ku bwapulezidenti mu kalulu ka bonna aka 2021 oluvannyuma lw’okwewandiisa.
Museveni ow’emyaka 76, y’akwatidde ekibiina kya National Resistance Movement (NRM) Bbendera.
Ono abadde awerekeddwako mukyala we, Janet Museveni n’ebikonge mu kibiina, asengejjeddwa era n’akakasibwa ssentebe w’akakiiko kano, Simon Byabakama, oluvannyuma lw’okwekebejja empapula ze nebalaba ng’agwanidde.
“Nangirira nti Yoweri Museveni Tibuhaburwa Kaguta, akakasiddwa okwesimbawo avuganye ku bwapulezidenti mu kulonda kwa 2021 oluvannyuma lw’okutuukiriza ebisaanyizo byonna ng’etteeka lya ‘Presidential elections Act 2005 bwe lirambika.” Byabakama bw’alangiridde.
Ebimu ku bisaanyizo eyeesimbyewo by’atwalira akakiiko kuliko obukakafu nti aweza obuyigirize bwa ssiniya eyoomukaaga, obukakafu nti yeewandiisa era nga mulonzi, obukakafu nti yasasudde ssente obukadde 20, wamu ne ssatifikeeti emuweereddwa ab’akakiiko k’ebyokulonda ku mikono egyamusemba.
Ebiwandiiko bya Museveni byekenneenyezeddwa bakamisona b’akakiiko okuli; Justine Ahabwe Mugabi, Peter Emorut, Ssentebe w’akakiiko Simon Byabakama, omumyuka we Aisha Lubega ne Mustafa Kigozi.
Bw’abadde tannalangirira Museveni, Byabakama asabye abanaaba bakakasiddwa okufaayo enteekateeka zaabwe nga bwe zigenda okutambula naddala gye bagenda okunoonyeza akalulu, kibayambe okubateekateeka obulungi.
Byabakama asinzidde wano n’ategeeza bwe bagenda okulangirira ennaku z’okulonderako enkya nga bamaze okukakasa abagenda okuvuganya mu kalulu kano.
Olumaze okukakasibwa, Pulezidenti Museveni ayogeddeko eri bannamawulire n’awera okuwangula akalulu era n’akuutira bannayuganda okwerinda ekirwadde kya Ssennyiga Corona.