Bya Ssemakula John
Kampala
Omukulembze w’eggwanga, Yoweri Kaguta Museveni atadde omukuno ku ku nnongoosereza mu tteeka ly’ekittavvu ky’abakozi ekya National Social Security Fund (NSSF) erigenda okusobozesa abakozi abawezezza emyaka 45 nga baterekedde emyaka 10 okufuna ku nsimbi zaabwe ez’ebukadde 20%.
Kino kiwalirizza ababaka b’abakozi mu Palamenti okusaba NSSF etandike ku nteekateeka eno mu bbanga lya mwezi gumu abakozi basobole okufuna ku ssente zaabwe.
Okusinziira ku bubaka obuweerezeddwa omuwandiisi wa Pulezidenti ow’ensonga z’amawulire, Linda Nabusaayi ng’ayita ku mukutu gwe ogwa Twitter n’akakasa ng’omukulembeze bw’atadde omukono ku tteeka lino eryayisibwa Palamenti gye buvuddeko.
Kino kitegeeza nti abakozi ababadde batereka n’ekitongole okumala emyaka 10, nabo abawezezza emyaka 45 baakufuna ebitundu 20 ku nsimbi zino ze babadde batereka.
Bo abaliko obulemu abawezezza emyaka 40 n’omusobyo bagenda kuweebwa ebitundu 50 ku buli 100 ku nsimbi zaabwe.
Era etteeka lino erikakasiddwa Pulezidenti Museveni zitaddewo ekibonerezo kya kusibwa myaka ettaano oba okutanzibwa amagoba ga bitundu 20 ku buli 100 ku nsimbi ze baba balina okuwaayo eri ekitongole kino.
Abamu ku babaka bagamba nti ensimbi zino zigenda kuyambako ku nnyota n’ebizibu by’ensimbi abakozi bye badde bayitamu olwa Ssennyiga Corona.